Radio Logo
RND
Höre {param} in der App.
Höre ព្រឹត្តិការណ៍អន្តរជាតិប្រចាំថ្ងៃ in der App.
(124.878)(171.489)
Sender speichern
Wecker
Sleeptimer
Sender speichern
Wecker
Sleeptimer
StartseitePodcastsNachrichten
ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Podcast ព្រឹត្តិការណ៍អន្តរជាតិប្រចាំថ្ងៃ
Podcast ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

hinzufügen

Verfügbare Folgen

5 von 24
  • ព្រឹត្តិការណ៍អន្តរជាតិប្រចាំថ្ងៃ - បារាំង​ចរចាអស់១៣​ឆ្នាំដើម្បី​សម្រេច​កិច្ចសន្យា​មហាសាលលក់​យន្តហោះ​ចម្បាំងឲ្យអេមីរ៉ាតអារ៉ាប់រួម
    នៅតំបន់ឈូងសមុទ្រពែរ្ស ប្រធានាធិបតី​បារាំង លោក​អេម៉ានុយអែល កំពុង​ផ្តើម​ទស្សនកិច្ចការទូត ប៉ុន្តែ ដែលបង្កប់​ដោយ​កិច្ចសន្យា​ពាណិជ្ជកម្ម នៅថ្ងៃ​សុក្រទី៣ និងថ្ងៃ​សៅរ៍ទី ៤ធ្នូ។ នៅក្នុង​ទស្សនកិច្ច ២​ថ្ងៃ ទៅកាន់​ប្រទេស​មហាសេដ្ឋីប្រេង នៅ​តំបន់​ឈូងសមុទ្រ​ពែរ្ស ដូចជា អេមីរ៉ាត អារ៉ាប់រួម កាតា និង​អារ៉ាប៊ី សាអូឌីត ប្រធានាធិបតី​បារាំង កំពុងរងការដាក់សម្ពាធ​ផងដែរ ពី​អង្គការ​ការពារ​សិទ្ធិមនុស្ស ដែល​បានទាមទារ​ឲ្យ​បារាំង ប្រកាន់ជំហរ តឹងរ៉ឹង ថ្កោលទោស​រិះគន់ ប្រទេសអារ៉ាប់ អ្នកមាន​ទាំងបី ដែល ល្បី​ខាង​រំលោភ​សិទ្ធិមនុស្ស។ តើ​ប្រធានាធិបតី បារាំង​ជ្រើសរើស​យកផ្លូវមួយណា? បារាំង​ដែល​ជា​ប្រទេសឲ្យ​តម្លៃ​លើ​ការគោរព​សិទ្ធិមនុស្ស នឹង​សុខចិត្ត និយាយ​រិះគន់​ការរំលោភសិទ្ធិមនុស្ស​នៅ ប្រទេស​អេមីរ៉ាត អារ៉ាប់រួម កាតា និង​អារ៉ាប៊ី សាអូឌីត ដោយ​សុខចិត្ត​លះបង់​ចោល​កិច្ចសន្យាពាណិជ្ជកម្ម​តម្លៃ រាប់ពាន់​លាន​អឺរ៉ូ ឬយ៉ាងណា ទស្សនកិច្ច​របស់​ប្រធានាធិបតី​បារាំង ទៅកាន់ប្រទេស​សំខាន់បី នៃ​តំបន់​ឈូងសមុទ្រ​ពែរ្ស មាន​ទិសដៅ ចូលរួម​រក្សា​ស្ថិរភាព តាំងពីតំបន់​មេឌីទែរ៉ាណេ រហូត​ដល់​ឈូង​សមុទ្រពែរ្ស។ នេះបើ​តាម​សេចក្តីប្រកាស​ព័ត៌មាន​របស់​វិមាន​ប្រធានាធិបតី​បារាំង។ លោក​ម៉ាក្រុង​ធ្វើដំណើរ​ទៅកាន់​ប្រទេស​អារ៉ាប់ទាំងបី អេមីរ៉ាត អារ៉ាប់រួម កាតា និងអារ៉ាប៊ី សាអូឌីត ដែលបារាំង ចាត់ទុក​ជា​ដៃគូសំខាន់ របស់​បារាំង និង​ជាអ្នកដើរ​តួនាទីចាំបាច់ ក្នុង​ការដោះស្រាយ​បញ្ហា នៅ​តំបន់​ដើមបូព៌ា។ តាមគម្រោង ប្រធានាធិបតី បារាំង ត្រូវ​ជជែក​ជាមួយ​ថ្នាក់ដឹកនាំ​របស់​ប្រទេស​អារ៉ាប់ទាំងបី ពី​យុទ្ធសាស្រ្ត​ប្រយុទ្ធប្រឆាំង​អំពើភេរវកម្ម ស្ថិរភាព និង​សន្តិសុខ​ក្នុងតំបន់ ពី​បញ្ហា​នុយក្លេអ៊ែរ​អ៊ីរ៉ង់ វិបត្តិសេដ្ឋកិច្ច​នៅ​លីបង់  និង​បញ្ហា​នៅ​លីប៊ី​ជាដើម។ តាម​វិមាន​ប្រធានាធិបតីបារាំង ប្រទេស​បារាំង​ប្រទេស​មហាអំណាច​ដែល​មាន​ស្ថិរភាពនឹងន ជា​ដៃគូ​មិនអាចខ្វះបាន និង​គួរ​ឲ្យជឿទុកចិត្ត សម្រាប់​តំបន់ឈូង​សមុទ្រពែរ្ស។ ជាក់ស្តែង​សម្រាប់​វិបត្តិ​នុយក្លេអ៊ែរ​អ៊ីរ៉ង់ដែល​ជា​ក្តីកង្វល់​សំខាន់​របស់​ប្រទេស​អារ៉ាប់ នៅ​ឈូង​សមុទ្រ​ពែរ្ស ប៉ារីស​កំពុង​ព្យាយាម​ចរចា សម្របសម្រួល ដើម្បី​បន្ធូរបន្ថយភាពតានតឹង។ ចរចាអស់១៣ ឆ្នាំ ដើម្បីអាច​ចុះកិច្ចសន្យា​លក់​យន្តហោះចម្បាំង៨០គ្រឿងឲ្យ​​អេមីរ៉ាតអារ៉ាប់រួម ក្រៅពី​ទស្សនកិច្ច​ការទូត ​លោក​ប្រធានាធិបតី​អេម៉ានុយអែលម៉ាក្រុង ដែល​ អមដំណើរ​ដោយ ​រដ្ឋមន្រ្តី​ការបរទេស រដ្ឋមន្រ្តី​សេដ្ឋកិច្ច និង​រដ្ឋមន្រ្តី​ក្រសួងការពារជាតិ និង​ប្រធានក្រុមហ៊ុន​បារាំង ធំៗ ជាង ៥០នាក់ បាន​ធ្វើដំណើរ​ទៅ​ប្រទេស​មហាសេដ្ឋីប្រេង និង​ឧស្ម័ន​ធំៗ​ទាំងបី​ ជាមួយ​វ៉ាលីស ដាក់​ កិច្ចសន្យា​លក់សព្វាវុធ​ ជាពិសេស កិច្ចសន្យា​លក់​យន្តហោះចម្បាំង​Rafale របស់​បារាំង។ នៅ​ថ្ងៃ​សុក្រ​ទី ៣​ធ្នូ នៅក្រោមអធិបតីភាព​របស់​ប្រធានាធិបតីបារាំង និង​រាជបុត្រស្នងរាជ្រ​របស់​អេមីរ៉ាត អារ៉ាប់រួម Mohammed Ben Zayed អេមីរ៉ាតអារ៉ាប់រួម បាន​ចុះកិច្ច​សន្យា​ទិញយន្តហោះ ចម្បាំង​Rafale របស់បារាំង ចំនួន​៨០គ្រឿង និង​ឧទ្ធម្ភាគចក្រ ១២គ្រឿង ក្នុង​តម្លៃសរុប ១៧ពាន់​លាន​អឺរ៉ូ។ អេមីរ៉ាត អារ៉ាប់រួម សម្រេច​ទិញ យន្តហោះចម្បាំង​បារាំង ដល់ទៅ ៨០គ្រឿង គឺច្រើនជាង​ចំនួន​៦០គ្រឿង ដែលបារាំង និង​អេមីរ៉ាតអារ៉ាប់រួម​ធ្លាប់បាន​ចរចា​អស់រយៈពេល ១៣​ឆ្នាំ។ ឌូបៃ ធ្លាប់​ចរចា​ទិញ យន្តហោះ​ចម្បាំង​Rafale របស់បារាំង ដើម្បី​ទៅ​ជំនួស​យន្តហោះចម្បាំង​ចាស់ៗ Mirage ដែល​អេមីរ៉ាតអារ៉ាប់​ធ្លាប់​ទិញ ពីបារាំង កាលពី​៣០ឆ្នាំមុន។ ប៉ុន្តែ អេមីរ៉ាតអារ៉ាប់រួម ដែល​ប្រើយន្តហោះចម្បាំង​អាមេរិក ធ្លាប់រារែក មិនទាន់​ចង់ទិញ យន្តហោះ​បារាំង និង​​បាន​ចរចា ទាមទារ​ឲ្យ​បារាំង​ទម្លាក់​តម្លៃ ក្នុង​ហេតុផល​ថា យន្តហោះចម្បាំង​បារាំង​មិនសូវ​ប្រកួតប្រជែង​ដូច​យន្តហោះ អាមេរិក។ លើកនេះ អេមីរ៉ាតអារ៉ាប់រួម សម្រេច​ទិញ​យន្តហោះ​ចម្បាំង របស់​បារាំង ក្នុង​ចំនួន​ដ៏ច្រើន ដើម្បី ទៅបំពាក់​ឲ្យ​កងទ័ព​របស់ខ្លួន គឺបន្ទាប់ពី ឃើញ សម្ព័ន្ធមិត្ត​អាមេរិក ដែលជា​អ្នកលក់ផ្គត់ផ្គង់​យន្តហោះ​ឲ្យខ្លួន ហាក់​ដូចជា​ ចង់​ដកខ្លួន​ចេញពី​តំបន់​ដើមបូព៌ា។ សម្រាប់​អេមីរ៉ាត​អារ៉ាប់រួម បារាំង ជា​ប្រទេស​ផ្គត់ផ្គង់​លក់សព្វាវុធ ធំមួយទៀត បន្ទាប់ពី​អាមេរិក។ នៅកាលៈទេសៈ​ដែល​អាមេរិក​ហាក់​ចង់​ដោះដៃ ដកខ្លួន​ចេញពី​តំបន់​ដើមបូព៌ា ដើម្បី ទៅ​បោះយុថ្កា ពង្រឹង​វត្តមានយោធា​របស់ខ្លួន​នៅ​តំបន់​អាស៊ី ប៉ាស៊ីហ្វិក បារាំងក៏ចង់​ឈ្លៀត​ឱកាស​នេះ ដើម្បី​ទៅ​ពង្រឹង​សម្ព័ន្ធភាព​របស់ខ្លួន​ជាមួយ ប្រទេស​អារ៉ាប់​ទាំងបី ជាពិសេស អារ៉ាប៊ី សាអូឌីត ប្រទេស​មហាសេដ្ឋីប្រេង​មួយទៀត ដែលពេលនេះ កំពុងស្ថិតក្នុង​ក្រសែភ្នែក​មិនល្អ​របស់​អាមេរិក ដោយសារ​តែ​ករណី​ឃាតកម្ម​លើ​អ្នកកាសែត ដែលមានពាក់ព័ន្ធ រាជបុត្រ​ស្នងរាជ្យ។ ត្រូវ​ដឹងថា​ដោយសារ​តែ​ករណី​ឃាតកម្ម​សម្លាប់​អ្នកកាសែត អារ៉ាប៊ី សាអូឌីត ព្រឹទ្ធសភា អាមេរិក នៅមិនទាន់​បោះឆ្នោតយល់ព្រម​ឲ្យ​អាមេរិក​លក់​សព្វាវុធ ទៅ​ឲ្យ​អារ៉ាប៊ី សាអូឌីតនោះទេ។ សម្រាប់​បារាំង ដរាបណា​អាមេរិក​នៅតែមាន​ទំនាក់ទំនង​មិន​សូវ​ល្អ ជាមួយ អារ៉ាប៊ី សាអូឌីត បារាំង នៅតែ​អាច​កេង​យកប្រយោជន៍​ពីកិច្ចសន្យា​លក់អាវុធ​តម្លៃរាប់ពាន់​លានអឺរ៉ូ នោះបើទោះបីជា​បារាំង ត្រូវ​ធ្វើអ្វី​ដែលមិន​សូវសមភ្នែក​អ្នកដទៃ​ក៏ដោយ។ ជាក់ស្តែង នៅ​ថ្ងៃសៅរ៍​ស្អែក លោក​ប្រធានាធិបតី​បារាំង នឹង​ក្លាយ​ជា​មេដឹកនាំ​ប្រទេស​លោកខាងលិច​ដំបូងគេ ដែល​នឹង​ចាប់ដៃ រលាក់​ជាមួយ រាជបុត្រស្នងរាជ្យ ម៉ូហាម៉េដ បិនសាល់ម៉ាន គិតចាប់តាំង​ពី​រាជបុត្រ​ស្នងរាជ្យមួយនេះ ត្រូវ​សង្ស័យថា ជាអ្នកនៅពីក្រោយ​ឃាតកម្ម​សម្លាប់អ្នកកាសែត​ប្រឆាំង លោក​ខាស៊្ហូហ្ស៊ី នៅទឹកដី​តួកគី​ក្តី។ បារាំង​ កំពុង​រង​ការចោទប្រកាន់​ថា បាន​ចងសម្ព័ន្ធភាពយោធា​ជាមួយ​ប្រទេស​អារ៉ាប់​ដែល​កំពុងរងការរិះគន់​ខាង​រំលោភសិទ្ធិមនុស្ស​ធ្ងន់ធ្ងរ អង្គការ​ការពារ​សិទ្ធិមនុស្ស ដូចជា FIFDH និង​អង្គការ​Human Rights Watch បាន​រិះគន់ រដ្ឋាភិបាល បារាំងថា គិត​តែចង់​បាន​ការចំណេញ ពីការលក់​សព្វាវុធ ដោយ​មិនខ្វល់ថា ​ប្រទេស​អេមីរ៉ាត អារ៉ាប់រួម កាតា និង​អារ៉ាប៊ី សាអូឌីត ល្បី ខាង​រំលោភសិទ្ធិមនុស្ស​ធ្ងន់ធ្ងរ។ ជាក់ស្តែង កាតា កំពុង​រងការចោទប្រកាន់​ថា បាន​រំលោភ​សិទ្ធិជនអន្តោប្រវេសន៍ ដែលកំពុងធ្វើការក្នុង​ការដ្ឋាន​សាងសង់​ពហុកីឡាដ្ឋាន​សម្រាប់​ការប្រកួតកីឡាបាល់ទាត់ពិភពលោក ឆ្នាំ ២០២២។ ប៉ុន្តែ នៅទីក្រុង​ដូហា នៅល្ងាច​ថ្ងៃ​សុក្រ ប្រធានាធិបតី​បារាំង នឹង​មិន​លើកយករឿង ផលរមាស់​ទាំងនោះទៅជជែក​ជាមួយ ព្រះចៅសុលតង់​របស់​ប្រទេស​កាតានោះទេ។ កាតា​ជាដៃគូវិនិយោគ​ដ៏ សំខាន់មួយ​របស់​បារាំង។ ម្យ៉ាងវិញទៀត ក្រុមអង្គការ​ការពារ​សិទ្ធិមនុស្ស ធ្លាប់​បាន​ព្រមាន រដ្ឋាភិបាលបារាំង​ផងដែរ ពី​ផលវិបាក​នៃការលក់​សព្វាវុធ និង​បច្ចេកវិទ្យា​យោធា ទៅ​ឲ្យ​ប្រទេស​ដែល​ជាប់ដៃ​ធ្វើសង្រ្គាម​នៅ​តំបន់ដើមបូព៌ា។ គេ​កំពុង​បារម្ភថា សព្វាវុធ​របស់​បារាំង ត្រូវ​បាន​ប្រទេស​មួយចំនួន ទិញ យកទៅប្រើ ក្នុង​ផ្លូវអាក្រក់ ដូចជា សម្រាប់ធ្វើ​សង្រ្គាម នៅ​យេម៉ែន ឬ​សម្រាប់​បង្រ្កាប​ទៅលើ​អ្នកប្រឆាំងជាដើម។ នៅ​ដើម​សប្តាហ៍នេះ វិបសៃត៍​មួយឈ្មោះ Disclose បាន​ទម្លាយ​ឲ្យ​គេដឹងថា កងទ័ព​អេហ្ស៊ីប​ប្រើ​ព័ត៌មាន​សំងាត់ របស់​បេសកកម្ម យោធា​បារាំង ដែល​បារាំង បាន​ចុះ​កិច្ចសន្យា​ជាមួយ អេហ្ស៊ីប ដើម្បី​ប្រយុទ្ធប្រឆាំង ក្រុមភេរវជន។ តាម​Disclose កងទ័ពអេហ្ស៊ីប​បានប្រើសម្ងាត់ដែល​បាន​មក​ពី​ភាគីបារាំង ដើម្បី យក​បង្រ្កាប​ក្រុមជួញរត់ពន្ធ​ខុសច្បាប់ នៅ​តាម​ព្រំដែន​លីប៊ី អេហ្ស៊ីប ដែលតាមពិត​ជា​ប្រជាជន​ស៊ីវិល។ ក្រសួងការពារជាតិ​បារាំង បាន​សន្យា​បើកការស៊ើបអង្កេតពីរឿងនេះ ប៉ុន្តែ យ៉ាងណាក៏ដោយ រដ្ឋាភិបាល​បារាំង​នៅតែ​ការពារ​ខ្លួន​ថា បារាំង​មិនអាច ផ្តោតសំខាន់​តែលើ​បញ្ហា​សិទ្ធិមនុស្ស និង​ដាក់ទណ្ឌកម្ម ចងដៃជើង ប្រទេស​អារ៉ាប់ ដូចជា​អារ៉ាប៊ី សាអូឌីត​ជាដើម ដែល​តាមពិត​ដើរ​តួនាទី​សំខាន់ ក្នុង​តំបន់​ដើមបូព៌ា​នោះទេ៕
    12/3/2021
    8:11
  • ព្រឹត្តិការណ៍អន្តរជាតិប្រចាំថ្ងៃ - ហេតុអ្វីបានជាមានការជជែកដេញដោលគ្នាយ៉ាងផុសផុលជុំវិញរឿងកាតព្វកិច្ចចាក់វ៉ាក់សាំងបង្ការកូវីដ១៩?
    មេរោគ​កូវីដ១៩ បំប្លែងខ្លួន​ថ្មី « អូមីក្រុង » ដែល​មាន​ប្រភព​ពី​ប្រទេស​អាហ្រ្វិកខាងត្បូង​កំពុង​បន្ត​ឆ្លង​ចូល​ប្រទេស​កាន់​តែ​ច្រើន​លើ​លោក។ ខណៈ​នេះ គេ​នៅ​មិន​ទាន់​ដឹង​ច្បាស់​ពី​កម្រិត​អត្រា​ឆ្លង និង​អត្រា​គ្រោះថ្នាក់​របស់​« អូមីក្រុង » នៅ​ឡើយ​ទេ។ អ្វី​ដែល​គេ​ដឹង មេរោគ​បំប្លែង​ខ្លួន​ថ្មី​មួយ​នេះ​កំពុង​ធ្វើ​ឲ្យ​គ្រប់​គ្នា​បារម្ភ និង​ជ្រួលច្របល់​ខ្លាំង។ មាន​ប្រទេស​ម្ត​មួយៗ​បាន​ចាត់​វិធាន​រឹតបន្តឹង​ព្រំដែន​អាកាស​ដោយ​បិទ ឬ​ព្យួរ​ការ​ហោះហើរ ពិសេស​ជា​មួយ​ក្រុម​ប្រទេស​អាហ្វ្រិក។ ទន្ទឹម​គ្នា​នេះ ការ​ជជែក​ដេញដោល​គ្នា​ជុំវិញ​កាតព្វកិច្ច​ចាក់​វ៉ាក់សាំង​បង្ការ​កូវីដ១៩ កំពុង​មាន​យ៉ាង​ផុសផុល។ មែនទែន​ទៅ រឿង​កាតព្វកិច្ច​ចាក់​វ៉ាក់សាំង​បង្ការ​កូវីដ១៩ មិនមែន​ជា​រឿង​ថ្មី និង​ក៏​មិនមែន​ទើប​លេច​ចេញ​ពេល​នេះ​ទេ ពោល​បាន​ចាប់​ផ្តើម​តាំង​ពី​ពិភពលោក​មាន​វ៉ាក់សាំង​មក​ម្ល៉េះ។ គ្រាន់​តែ​ថា មាន​ប្រទេស​ខ្លះ​បាន​ដាក់​ការ​ចាក់​វ៉ាក់សាំង​ជា​កាតព្វកិច្ច​ដែល​ប្រជាជន​គ្រប់​រូប​ត្រូវ​តែ​ចាក់ និង​ខ្លះ​ទៀត​ទុក​ជម្រើស​ឲ្យ​ប្រជាជន​ម្នាក់ៗ​ជា​អ្នក​ជ្រើសរើស​ខ្លួន​ឯង។ គិត​មក​ដល់​សព្វថ្ងៃ​នេះ មាន​ប្រទេស​តិចតួច​ណាស់​ដែល​បាន​ដាក់​ការ​ចាក់​វ៉ាក់សាំង​បង្ការ​កូវីដ១៩ ជា​កាតព្វកិច្ច​សម្រាប់​ប្រជាជន​គ្រប់​រូប ក្នុង​នោះ​មាន​ឥណ្ឌូណេស៊ី និង​តួកម៉េនីស្ថាន។ បន្ទាប់​មក មាន​ប្រទេស​ខ្លះ​ទៀត​បាន​ដាក់​ការ​ចាក់​វ៉ាក់សាំង​ជា​កាតព្វកិច្ច​សម្រាប់​តែ​ប្រភេទ​មនុស្ស​មួយ​ចំនួន​ប៉ុណ្ណោះ ដូច​ជា​ក្រុម​បុគ្គលិកពេទ្យ ក្រុម​អ្នក​ធ្វើ​ការ​តាម​ក្រុមហ៊ុន ឬ​តាម​ហាង​លក់​ទំនិញ​ធំៗ​ដែល​ទទួល​សាធារណៈជន​ផ្ទាល់។ តែ​បញ្ហា​នៅ​ត្រង់​ថា ករណី​ឆ្លង​ថ្មី​កំពុង​បន្ត​មាន និង​កើន​ខ្លាំង​ជា​ថ្មី​នៅ​ពេល​នេះ ពិសេស​នៅ​អឺរ៉ុប។ ឥឡូវ​នេះ​ទៀត ពិភពលោក​កំពុង​ប្រឈម​នឹង​មេរោគ​បំប្លែងខ្លួន​ថ្មី​មួយ​ទៀត​ឈ្មោះ « អូមីក្រុង »។ នេះ​ហើយ​ជា​ដើមចម​ដែល​បាន​បំផុស​ឲ្យ​មាន​ការ​ជជែក​ដេញដោល​ជុំវិញ​រឿង​កាតព្វកិច្ច​ចាក់​វ៉ាក់សាំង​នៅ​ពេល​នេះ ពិសេស​នៅ​អឺរ៉ុប។ តើ​គេ​គួរ​ដាក់​ឲ្យ​មាន​កាតព្វកិច្ច​ចាក់​វ៉ាក់សាំង​បង្ការ​កូវីដ១៩ ដែរ ឬ​ទេ? គេ​អាច​ចែក​កាតព្វកិច្ច​ចាក់​វ៉ាកសាំង​ជា​ពីរ​បែប គឺ​កាតព្វកិច្ច​ដោយ​ផ្ទាល់ និង​កាតព្វកិច្ច​ដោយ​ប្រយោល។ កាតព្វកិច្ច​ដោយ​ផ្ទាល់ គឺ​តម្រូវ​ឲ្យ​ចាក់​ដោយ​មិន​អាច​គេច​រួច។ ចំណែក​កាតព្វកិច្ច​ដោយ​ប្រយោល គឺ​តម្រូវ​ឲ្យ​មាន​លិខិត​បញ្ជាក់​ចាក់​វ៉ាក់សាំង ឬ​លិខិត​តេស្តិ៍​អវិជ្ជមាន​កូវីដ១៩​ទើប​អាច​ទៅ​ភោជនីយដ្ឋាន ទៅ​មើល​កុន ទៅ​ទស្សនា​ក្នុង​សារៈមន្ទីរ ទៅ​ចូលរួម​នៅ​ក្នុង​ពិធី​អ្វី​មួយ ឬ​មួយ​ក៏​ធ្វើ​ដំណើរ​ចេញ​ក្រៅ​ប្រទេស។ ការ​តម្រូវ​នេះ​បាន​ធ្វើ​ឲ្យ​ក្រុម​មនុស្ស​ដែល​ប្រឆាំង​វ៉ាក់សាំង​ហាក់​គ្មាន​ជម្រើស​អ្វី​ផ្សេង​ក្រៅ​ពី​បង្ខំចិត្ត​ទៅ​ចាក់​វ៉ាក់សាំង។ រហូត​មក​ដល់​ពេល​នេះ វ៉ាក់សាំង​បាន​ហុច​អត្ថប្រយោជន៍​ច្រើន ទោះ​បី​ជា​វា​មិន​អាច​ការពារ​បាន ១០០% ក៏​ដោយ។ យ៉ាង​ហោច​ណាស់ វ៉ាក់សាំង​បាន​ការពារ​មិន​ឲ្យ​អ្នក​ឆ្លង​កូវីដ១៩​ដែល​បាន​ចាក់​វ៉ាក់សាំង​រួច​ធ្លាក់​ខ្លួន​ឈឺ​ធ្ងន់ធ្ងរ​រហូត​ដល់​ចូល​ពេទ្យ។ ការ​ដែល​មាន​ប្រទេស​ខ្លះ​ចាប់​បើក​ទ្វារ​ឡើង​វិញ សេដ្ឋកិច្ច​សកល​ចាប់​មាន​សន្ទុះ​ជា​ថ្មី ឬ​មួយ​ក៏​មាន​ប្រទេស​ជា​ច្រើន​បាន​បន្ធូរបន្ថយ​វិធានការ​រឹតបន្តឹង​ក៏​ដោយសារ​តែ​ប្រទេស​នោះ​មាន​អត្រា​អ្នក​ចាក់​វ៉ាក់សាំង​ខ្ពស់​ដែរ។ អ្នក​ដែល​កំពុង​ប្រឈម​នឹង​ហានិភ័យ​នឹង​កូវីដ១៩ ឬ​មេរោគ​កូវីដ១៩ បំប្លែង​ខ្លួន​ខ្លាំង​ពេល​នេះ គឺ​ក្រុម​មនុស្ស​ដែល​មិន​ព្រម​ចាក់​វ៉ាក់សាំង។ ពិត​ណាស់​នៅ​ក្នុង​ក្រុម​ប្រទេស​ប្រជាធិបតេយ្យ ការ​បង្ខិតបង្ខំ​ជា​ការ​រំលោភ​សិទ្ធិ។ តែ​ពេល​ខ្លះ និង​ដើម្បី​ប្រយោជន៍​រួម កាតព្វកិច្ច​ជា​រឿង​មិន​អាច​ចៀស​រួច ពិសេស​ពាក់ព័ន្ធ​នឹង​រឿង​សុខភាព។ ប្រឈម​នឹង​មេរោគ​បំប្លែងខ្លួន​ថ្មី « អូមីក្រុង » ពេល​នេះ មាន​ប្រទេស​ជា​ច្រើន ពិសេស​នៅ​អឺរ៉ុប​កំពុង​ពិចារណា​ពី​ការ​ដាក់​កាតព្វកិច្ច​ចាក់​វ៉ាក់សាំង។ ប្រមុខ WHO លោក​ទេដ្រូស​ព្រមាន​ពី​ទឹកក្រឡុក « តុកស៊ិច » លោក​ទេដ្រូស ប្រមុខ​អង្គការ​សុខភាពពិភពលោក​បាន​ព្រមាន​ប្រឆាំង​នឹង​ទឹកក្រឡុក​« តុកស៊ិច » ឬ​ពិសពុល​ដែល​ក្រឡុក​បញ្ចូល​គ្នា​រវាង​អត្រា​ចាក់​វ៉ាក់សាំង​ទាប និង​អត្រា​ធ្វើ​តេស្តិ៍​កូវីដ១៩ តិចតួច​ក្នុង​លោក។ តាម​ប្រមុខ​អង្គការ​សុខភាព​ពិភពលោក វិសមភាព​ក្នុង​ការ​ចាក់​វ៉ាក់សាំង និង​ការ​ធ្វើ​តេស្តិ៍​រក​កូវីដ១៩ ដែល​មាន​កម្រិត​ទាប​ជា​ដើមចម​នៃ​ការ​បន្ត​មាន​មេរោគកូវីដ១៩ បំប្លែងខ្លួន​មក​ដល់​ពេល​នេះ។ ថ្ងៃ​ម្សិលមិញ​មាន « ដែលតា » ថ្ងៃ​នេះ​មាន « អូមីក្រុង »តើ​ថ្ងៃ​ស្អែក និង​ថ្ងៃ​ខាន​ស្អែក​នឹង​មាន​មេរោគបំប្លែងខ្លួន​ស្អី​ទៀត​ទៅ។ លោក​ទេដ្រូស​បាន​ព្រមាន​ថា ការ​បិទបញ្ចប់​ជំងឺ​ឆ្លង​រាតត្បាត​ជា​បញ្ហា​នៃ​ជម្រើស។ នៅ​ក្នុង​ជម្រើស​នេះ ឬ​មួយ​គេ​បន្ត​រក្សា​ទុក​ស្ថានភាព​ដូច​សព្វថ្ងៃ​ដោយ​រង់ចាំ​មេរោគ​កូវីដ១៩ បំប្លែងខ្លួន​ថ្មីៗ​ទៀត ឬ​មួយ​ក៏​គេ​រួម​គ្នា​ចែកចាយ​វ៉ាក់សាំង​ជា​លក្ខណៈ​សកល​ដោយ​គ្មាន​ការ​រើសអើង​រវាង​ក្រុម​ប្រទេស​អ្នក​មាន និង​ក្រុម​ប្រទេស​អ្នក​ក្រ។ ចូរ​កុំ​ភ្លេច​ថា គឺ​ភាព​រើសអើង និង​ជាតិនិយម​វ៉ាក់សាំង​នេះ​ឯង​ដែល​បាន និង​កំពុង​អូសជើង​ពិភពលោក​នៅ​ក្នុង​វិបត្តិ​កូវីដ១៩ មក​ដល់​បច្ចុប្បន្ន។ អង្គការ​កិច្ចសហប្រតិបត្តិការ និង​អភិវឌ្ឍ​សេដ្ឋកិច្ច​ហៅ​កាត់ OCDE យល់​ថា អាទិភាព​ចម្បង​គឺ​ធានា​ការ​ផលិត និង​ការ​ចែកចាយ​វ៉ាក់សាំង​ឲ្យ​បាន​លឿន​បំផុត​នៅ​ទូទាំង​ពិភពលោក។ លោកស្រី Laurence Boone ប្រធាន​សេដ្ឋវិទូ​របស់ OCDE បាន​សម្តែង​ការ​ខកចិត្ត​យ៉ាង​ខ្លាំង​ចំពោះ​សកម្មភាព​របស់​ក្រុម​ប្រទេស G២០។ តាម​លោកស្រី Laurence G២០ បាន​ចំណាយ​លុយ​ដល់​ទៅ ១០ទ្រីលានដុល្លារ​ដើម្បី​ការពារ​សេដ្ឋកិច្ច​របស់​ខ្លួន​នៅ​ក្នុង​វិបត្តិ​កូវីដ១៩។ តែ​ការ​ចាក់​វ៉ាក់សាំង​បង្ការ​កូវីដ១៩ ឲ្យ​ពិភពលោក​ទាំង​មូល​ដែល​ត្រូវ​ចំណាយ​លុយ​ត្រឹម ៥០ ០០០លានដុល្លារ បែរ​ជា G២០ ពិបាក​ចំណាយ​ទៅ​វិញ៕
    12/2/2021
    6:19
  • ព្រឹត្តិការណ៍អន្តរជាតិប្រចាំថ្ងៃ - កូវីដបាន​មក​បំផ្លាញ​ ការប្រឹងប្រែង​កន្លងមក ក្នុង​​ការ​​ប្រយុទ្ធ​​ប្រឆាំង​​នឹង​ជំងឺ​អេដស៍-​ស៊ីដា
    ដូចជារៀងរាល់ឆ្នាំ ថ្ងៃទី១ធ្នូ គឺជាទិវាអន្តរជាតិ នៃជំងឺស៊ីដា ឬជីងឺអេដស៍។ វាគឺជាជំងឺដ៏កាចសាហាវមួយ ដែលរហូតមកទល់ពេលនេះ នៅតែពុំទាន់មានវ៉ាក់សាំងបង្ការនៅឡើយទេ។ ក្នុងឆ្នាំ​២០២០ ជំងឺអេដស៍ បានសម្លាប់ជីវិតមនុស្ស​ ចំនួនប្រមាណ​៦៨ម៉ឺននាក់។ ជាងនេះទៀត ការប្រឹងប្រឹង ក្នុង​ការប្រយុទ្ធប្រឆាំងជំងឺនេះ ហាក់បានដើរថយក្រោយនៅក្នុងឆ្នាំ​២០២០កន្លងទៅ ដោយសារតែពិភពលោកយើង​ បានពើបប្រទះ​នូវ​វិបត្តិ​ជំងឺ​កូវីដ១៩។ ជាក់ស្តែង​នៅបារាំង ទីភ្នាក់សុខភាពសាធារណៈបារាំង ​បាន​បង្ហាញតួលេខថា ក្នុងឆ្នាំ​២០២០ ការធ្វើតេស្តឈាមរកមេរោគអេដស៍ បានចុះថយគួរឲ្យ​ព្រួយបារម្ភ បើប្រៀបធៀបទៅឆ្នាំ​២០១៩។ ឆ្នាំ​២០២០ ការធ្វើតេស្តឈាមរកមេរោគ​HIVចុះថយ១៦% នៅបារាំង យោងតាមទីភ្នាក់ងារសុខភាពសាធារណៈបារាំង គឺក្នុងឆ្នាំ​២០២០កន្លងទៅ ការធ្វើតេស្តឈាម ដើម្បីពិនិត្យរកមេរោគអេដស៍ គឺមានចំនួនប្រមាណ ៥,២លានតេស្ត នៅទូទាំងប្រទេសបារាំង ពោលគឺវាបានចុះថយ ចំនួន១៤% បើប្រៀបធៀបទៅ កម្រិតមធ្យម រវាងពីឆ្នាំ២០១៣ ដល់ឆ្នាំ២០១៩។ ចំណែក លទ្ធផល​តេស្ត​ឈាម​ រកឃើញមាន​មេរោគHIV គឺមានចំនួនសរុប ប្រមាណ ៤៨៥៦ករណី ក្នុងឆ្នាំ២០២០ ពោលគឺវាបានធ្លាក់ចុះ ចំនួន​២២% បើប្រៀបធៀបទៅឆ្នាំ​២០១៩។ បើតាម ទីភ្នាក់ងារសុខភាពបារាំង វាមានហេតុផលមួយចំនួន នៅពីក្រោយ​ការធ្លាក់ចុះ។ ទីមួយគឺ គឺដោយសារវិធានការបិទខ្ទប់ ក្នុងឆ្នាំ២០២០ បន្ទាប់ពី​មានការឆ្លងរាលដាលកូវីដ។ វិធានការបិទខ្ទប់ ធ្វើឲ្យ​មនុស្សមិនអាចចេញ ឬមិនចង់ចេញធ្វើតេស្តឈាមរកមើលមេរោគHIV ហើយចំណែក​យុទ្ធនាការផ្សព្វផ្សាយ បង្ការជម្ងឺអេដស៍​ក៏បានចុះខ្សោយ ឬអាក់ខានដែរ។ ទន្ទឹមនឹងនេះ បណ្តាញភ្នាក់ងារសុខាភិបាលជំនាញ ដែលមានតួនាទីធ្វើតេស្តនេះ ក៏បានជួបភាពរអាក់រអួលដែរ ដោយសារវិធានការសុខាភិបាល ត្រូវផ្តោតការប្រឹងប្រែង ប្រញ៉េបប្រញាប់ធ្វើតែតេស្ត ពិនិត្យជំងឺកូវីដ ដែលកំពុងតែបន្ទាន់ខ្លាំង។ វិបត្តិជំងឺ​កូវីដ១៩ បានគ្របដណ្តប់ ពាសពេញផ្ទៃនៃប្រព័ន្ធសុខាភិបាល ព្រមទាំងប្រព័ន្ធផ្សព្វផ្សាយ ដែលធ្វើឲ្យ​គ្រប់គ្នា ភ្លេចមេរោគជំងឺមួយទៀត ដែលកាចសាហាវខ្លាំងដែរ គឺជំងឺ អេដស៍ ឬស៊ីដា នេះឯង។ ទាំងនេះគឺជាតួលេខ នៅក្នុងប្រទេសបារាំងមែនពិត តែវាបានស្តែងឲ្យឃើញ នូវទំនោរធ្លាក់ចុះនៅទូទាំងពិភពលោក​តែ​ម្តង ​នៃការធ្វើតេស្តរកមេរោគអេដស៍នេះ​។ នៅបារាំង ដែលមានប្រព័ន្ធសុខាភិបាលល្អ មានការផ្សព្វផ្សាយឲ្យ​ប្រជាជនយល់ដឹង និង​ធ្វើតេស្តឈាម តាមដានបានល្អម្លឹងហើយ ការធ្វើតេស្តឈាមរកមេរោគអេដស៍ បានធ្លាក់ចុះប៉ុណ្ណេះ ចុះទម្រាំនៅតាមប្រទេសក្រីក្រផ្សេងទៀត វាយ៉ាងណាទៅ? ហានិភ័យនៃការធ្វើតេស្តរកមេរោគយឺតពេល ការមិនធ្វើតេស្តរកមេរោគជំងឺ​អេដស៍ ឲ្យ​បានទាន់ពេលវេលា គឺមានន័យថា មនុស្សកាន់តែប្រឈមខ្លាំង នឹងភាពធ្ងន់ធ្ងរនៃជំងឺអេដស៍។ ពោលគឺ ដល់ទៅធ្លាក់ខ្លួនឈឺគ្រឹប ទើបទៅធ្វើតេស្តឈាមបានដឹងថាមានមេរោគ​HIV ហើយវា​ដល់ដំណាក់កាលមួយដែលធ្ងន់ អាចពិបាកក្នុងការព្យាបាល។  ជាក់ស្តែង​ក្នុងឆ្នាំ​២០២០ នៅបារាំង ៣០%នៃករណីរកឃើញថ្មីនៃមេរោគHIV គឺជាករណីឈឺដំណាក់កាលធ្ងន់ទៅហើយ។ មួយវិញទៀត ការធ្វើតេស្តយឺតយ៉ាវ គឺវាអាចបន្ថែម​ ការប្រឈម  ដែល​មនុស្សអាច​ចម្លងមេរោគនេះ ទៅអ្នកផ្សេងទៀត ដោយ​មិនដឹងខ្លួន។ ដូច្នេះ ធ្វើតេស្ត​​បានឆាប់កាលណា គឺវាល្អកាលនោះ។ ជាងនេះទៀត ការផ្តល់ថ្នាំលេប ប្រភេទ Prophylaxie préexposition (PrEP) ដែលជាថ្នាំបង្ការ លេបក្នុងករណី សង្ស័​យ​ប្រឈមនឹងការ​ឆ្លង​មេរោគHIV  ក៏បានធ្លាក់ចុះដែរ។ រវាងពីខែ មីនា ឆ្នាំ២០២០ ដល់ខែមេសា ឆ្នាំ២០២១ យោងតាមទីភ្នាក់ងារសុខភាពសាធារណៈបារាំង គឺការផ្តល់ថ្នាំគ្រាប់ប្រភេទនេះ បានធ្លាក់ចុះចំនួន១៧%។ មានន័យ​ថា ករណីប្រឈមនឹងការឆ្លងមេរោគHIV ដោយ​មិនអាចទទួលបាន ថ្នាំលេបទប់ឲ្យ​ទាន់ពេលវេលានោះ ក៏​វាមានកំណើនដែរ។ បញ្ហានេះ គឺបណ្តាល​មកពីវិធានាការបិទខ្ទប់ ក្នុងវិបត្តិកូវីដ​១៩នេះឯង។ យោងតាមលោកស្រី Florence Thune នាយិកា​សមាគមSidaction ក្នុងឆ្នាំ​២០២០កន្លងទៅនេះ ចំនួននៃការ ចាប់ផ្តើម​ព្យាបាល ករណីអ្នកជំងឺអេដស៍ថ្មីៗ នៅបារាំង បាន​ធ្លាក់ចុះប្រមាណ២០%។​ ការធ្លាក់ចុះនេះ គឺបណ្តាល​មកពី វិបត្តិកូវីដ​១៩ ដោយផ្ទាល់ និងដោយប្រយោល។ បន្ថែមពីនេះ ការ​ធ្វើតេស្តឈាម រកមេរោគ បាក់តេរី៣ប្រភេទផ្សេងទៀត ដែលឆ្លងតាមការរួមភេទដែរ ដែលភាសាបច្ចេកទេស​ ហៅថា IST bactériennes (Infections à Chlamydia Trachomatis, Gonococcie, Syphilis) ក៏បានធ្លាក់ចុះគួរឲ្យ​បារម្ភណាស់ដែរ នៅបារាំង។ មេរោគHIV បំប្លែងខ្លួនរហ័ស ពិបាកនឹងរកវ៉ាក់សាំង មេរោគអេដស៍ បានផ្តើមចេញរូបរាង្គ នៅឆ្នាំ​១៩៨១។ មកទល់ពេលនេះ គឺវា​៤០ឆ្នាំហើយ តែអ្នកវិទ្យាសាស្ត្រនៅតែមិនទាន់រកឃើញថ្នាំវ៉ាក់សាំងបាន។​ ដោយឡែក ជាមួយនឹងជំងឺ​កូវីដ១៩ ក្រុមអ្នកវិទ្យាសាស្ត្រ បាន​ប្រឹងប្រែង រកឃើញថ្នាំវ៉ាក់សាំងបាន ក្នុងពេលមិនដល់១ឆ្នាំ។ មេរោគនីមួយៗ វាខុសៗគ្នា យើងមិនអាចយក មេរោគ ​HIV មកប្រៀបធៀបដោយងាយៗ ជាមួយ​មេរោគកូរ៉ូណាវីរុស បានទេ។ មានហេតុផល និងកត្តាជាច្រើន នៅពីក្រោយ​ភាពបរាជ័យ ក្នុងការស្រាវជ្រាវរកវ៉ាក់សាំងបង្ការជំងឺអេដស៍​។ លោក Oliver Schwartz នាយកផ្នែកស្រាវជ្រាវមេរោគ នៅវិទ្យាស្ថានប៉ាស្ទ័របារាំង បានពន្យល់ថា ហេតុផលធំបំផុត គឺ​​វាស្ថិតនៅលើ​ លក្ខណៈស្មុគស្មាញនៃមេរោគHIV នៅពេលវាចូលក្នុងខ្លួនមនុស្ស​ ទៅវាយលុកកោសិកាដែលជាធាតុផ្សំ នៃ​ប្រព័ន្ធការពារខ្លួនរបស់​មនុស្សយើង។​ មួយវិញទៀត មេរោគ HIV បំលែងខ្លួន បានលឿនរហ័សណាស់ ពោលគឺរហ័សជាងមេរោគជំងឺកូវីដឆ្ងាយណាស់។ ការបំលែងខ្លួន លឿនរហ័សនេះ ជាឧបសគ្គដ៏ធំមួយទៀត ធ្វើឲ្យ​វ៉ាក់សាំង គ្មានប្រសិទ្ធភាពទេ។ ទន្ទឹមគ្នានេះ ក្រុមហ៊ុនមន្ទីរពិសោធន៍ឱសថធំៗ ក៏មិនសូវចង់ចំណាយ ដើមទុនធំ ក្នុងការរកវ៉ាក់សាំងប្រឆាំងមេរោគHIV ដែរ ព្រោះថា គេដឹងថា​ នឹងមិនមានមនុស្សទូទៅ គ្រប់គ្នាទៅចាក់វ៉ាក់សាំងប្រភេទនេះដែរ គឺមានតែអ្នកប្រឈមខ្លាំងតែប៉ុណ្ណោះ ជាក់ស្តែង អ្នករកស៊ីបំរើសេវាកម្មផ្លូវភេទជាដើម។ តែយ៉ាងណាហេតុផល គិតតែប្រាក់ចំណេញនេះ គឺមិនអាចទទួលយកបានទេ ពីសំណាក់អង្គការ សមាគមនានា ព្រោះថាបើយើងក្រលេកមើលចំនួនអ្នកផ្ទុកមេរោគអេដស៍បច្ចុប្បន្ន ដែលមានប្រមាណ​៣៨លាននាក់ទូទាំងពិភពលោក គឺពួកគេមិនមែនជាអ្នកបំរើសេវាកម្មផ្លូវភេទទាំងអស់នោះទេ។ មនុស្សណាក៏អាចរងគ្រោះ ឆ្លងមេរោគនេះដែរ។ តែទោះជាគ្មានវ៉ាក់សាំងក៏ដោយ តែអ្នកវិទ្យាសាស្ត្របានដើរទៅមុខច្រើនណាស់ ក្នុងការរកឃើញថ្នាំព្យាបាល ដែល​មានប្រសិទ្ធភាពល្អណាស់។ ថ្នាំព្យាបាល​ប្រភេទ Trithérapie Antirétroviraux មានគុណភាព ប្រសិទ្ធភាពកាន់តែល្អឡើងៗ ជួយសង្គ្រោះ ឲ្យអ្នកផ្ទុកមេរោគHIV អាចរស់នៅបានយ៉ាងធម្មតាបំផុត និងមិនចម្លងមេរោគនេះទៅអ្នកផ្សេង។ ដោយឡែកបច្ចុប្បន្ននេះ មន្ទីរពិសោធន៍ Moderna បានអះអាងថា គេកំពុងតែស្រាវជ្រាវវ៉ាក់សាំងប្រឆាំងជំងឺអេដស៍ ដោយ​ប្រើបច្ចេកទេស ARN Messager ដូចវ៉ាក់សាំងបង្ការកូវីដដែរ។ នេះជាក្តីសង្ឃឹមមួយ តែប្រហែលជាត្រូវរងចាំ​ច្រើនឆ្នាំទៅមុខទៀត ទម្រាំដឹងលទ្ធផល៕
    12/1/2021
    8:06
  • ព្រឹត្តិការណ៍អន្តរជាតិប្រចាំថ្ងៃ - សេដ្ឋកិច្ចសកលដែលទើបងើបឡើងបន្តិចកំពុងរងការគំរាមកំហែងជាថ្មីដោយមេរោគបំប្លែងខ្លួនថ្មី « អូមីក្រុង »?
    នៅ​ថ្ងៃ​ចន្ទ ទី២៩ វិច្ឆិកា ក្រុម​ប្រទេស​មហាអំណាច​ឧស្សាហកម្ម​ទាំង ៧ប្រទេស​ក្នុង​លោក​ហៅកាត់ G៧ បាន​អំពាវនាវ​ឲ្យ​មាន​សកម្មភាព​បន្ទាន់​ដើម្បី​ប្រឈម​ទប់​នឹង​មេរោគបំប្លែងខ្លួន​ថ្មី « អូមីក្រុង »។ សម្រាប់​អង្គការ​សុខភាពពិភពលោក មេរោគបំប្លែងខ្លួន​ថ្មី​មក​ពី​អាហ្រ្វិកខាងត្បូង​មួយ​នេះ​មាន​កម្រិត​ហានិភ័យ​ខ្ពស់។ ចំណែក​ប្រធានាធិបតី​អាមេរិក​លោក​ចូ បៃដិន​ក៏​បាន​សម្តែង​ក្តីបារម្ភ​ដូច​គ្នា តែ​ធានា​ថា គេ​គ្មាន​ហេតុផល​អ្វី​ដែល​ត្រូវ​ជ្រួលច្របល់​ទេ។ ទោះ​ជា​យ៉ាង​នេះ​ក្តី មាន​ប្រទេស​កាន់​តែ​ច្រើន​បាន​ចាត់​វិធានការ​ទប់ស្កាត់ ដូច​ជា​ការ​បិទព្រំដែន ឬ​មួយ​ក៏​លើក​ពេល​បើក​ប្រទេស​ជា​ដើម។ សេដ្ឋកិច្ច​ពិភពលោក​ដែល​ទើប​ស្គាល់​ភាព​ប្រសើរ​បន្តិច​ឡើង​វិញ​កំពុង​ទទួល​ការ​គំរាមកំហែង​ជា​ថ្មី​ដោយ​មេរោគបំប្លែងខ្លួន​ថ្មី « អូមីក្រុង » ឬ​អត់ គឺ​អាស្រ័យ​ទាំង​ស្រុង​លើ​ការ​វិវត្តន៍​របស់​មេរោគបំប្លែងខ្លួន​ថ្មី « អូមីក្រុង »នៅ​ពេល​ខាង​មុខ។ « អូមីក្រុង »ដែល​មាន​ប្រភព​ចេញ​ពី​ប្រទេស​អាហ្រ្វិកខាងត្បូង​ជា​មេរោគបំប្លែងខ្លួន​ថ្មី​ស្រឡាង និង​ជា​មេរោគបំប្លែងខ្លួន​ថ្មី​មួយ​ដែល​គេ​នៅ​មិន​ទាន់​បាន​ស្គាល់​ច្បាស់​ពី​អត្តសញ្ញាណ​របស់​វា។ ពិត​ណាស់ អង្គការ​សុខភាព​ពិភពលោក​បាន​ចាត់​ទុក​ជា​មេរោគ​បំប្លែងខ្លួន​ដែល​មាន​កម្រិត​ហានិភ័យ​ខ្ពស់។ តែ​នៅ​មិន​ទាន់​អាច​បញ្ជាក់​បាន​នៅ​ឡើយ​ពី​កម្រិត​អាត្រា​គ្រោះថ្នាក់ និង​កម្រិត​អត្រា​ឆ្លង​របស់​វា។ ខណៈ​នេះ អង្គការ​សុខភាព​ពិភពលោក រួម​ទាំង​ក្រុម​អ្នកវិទ្យាសាស្រ្ត​នៅ​ទូទាំង​សកលលោក​កំពុង​ធ្វើ​ការ​សិក្សា វិភាគ​លើ « អូមីក្រុង »។ ការ​សិក្សា​អាច​ផ្តល់​ចម្លើយ ៣ ទី១ « អូមីក្រុង »អាច​ជា​មេរោគបំប្លែង​ខ្លួន​ស្លូត ទី២ « អូមីក្រុង »អាច​ជា​មេរោគបំប្លែង​ខ្លួន​កាច​ល្មម និង​ទី៣ « អូមីក្រុង »អាច​ជា​មេរោគបំប្លែង​ខ្លួន​កាច​ខ្លាំង​ជាង​មេរោគបំប្លែងខ្លួន « ដែលតា »ដែល​កំពុង​គ្របដណ្តប់​ពិភពលោក​សព្វថ្ងៃ។ ផ្តើម​ចេញ​ពី​សេណារីយ៉ូ​ខាង​លើ គេ​អាច​ទាញ​ចេញ​នូវ​ការ​ព្យាករ​សម្រាប់​សេដ្ឋកិច្ច​សកល​នៅ​ឆ្នាំ ២០២២ ខាង​មុខ។ តាម​ការ​ព្យាករ​របស់​អង្គការ​មូលនិធិរូបិយវត្ថុ​អន្តរជាតិ​ក្នុង​ខែ​តុលា​កន្លង​ទៅ កំណើន​សេដ្ឋកិច្ច​សកល​នៅ​ឆ្នាំ ២០២២ មាន​អត្រា ៤,៩%។ តែ​បើ​មេរោគបំប្លែងខ្លួន​ថ្មី « អូមីក្រុង »បង្ក​គ្រោះថ្នាក់​តិចតួច ហើយ​វ៉ាក់សាំង​សព្វថ្ងៃ​មាន​ប្រសិទ្ធិភាព​អាច​ទប់ទល់​វា​បាន អត្រា​កំណើន​សេដ្ឋកិច្ច​សកល​ឆ្នាំ ២០២២ នឹង​បន្ត​មាន តែ​អាច​ធ្លាក់​ចុះ​តិចតួច ពោល​ពី ៤,៩% មក​នៅ​ត្រឹម ៤,៤៥%។ ផ្ទុយ​ទៅ​វិញ បើ​មេរោគបំប្លែងខ្លួន​ថ្មី « អូមីក្រុង »បង្ក​គ្រោះថ្នាក់​ខ្លាំង​រហូត​មាន​ការ​បិទខ្ទប់​នៅ​ក្នុង​ប្រទេស​ជា​ច្រើន និង​ការ​ក្រុង​ប្រជាជន​មិន​ឲ្យ​ចេញ​ពី​ផ្ទះ អត្រា​កំណើន​សេដ្ឋកិច្ច​សកល​ឆ្នាំ ២០២២ ក៏​នឹង​បន្ត​មាន តែ​អាច​ធ្លាក់​ចុះ​ពាក់កណ្តាល​មក​នៅ​ត្រឹម ២,៣%។ ឃើញ​ថា ទោះ​ក្នុង​សេណារីយ៉ូ​មួយ​ណា​ក៏​ដោយ សេដ្ឋកិច្ចពិភពលោក​នៅ​តែ​មាន​កំណើន​ដដែល។ គ្រាន់​តែ​ថា​មាន​តិច​ជាង​ការ​ព្យាករ​នៅ​មុន​ពេល​លេច​មេរោគបំប្លែងខ្លួន​ថ្មី « អូមីក្រុង »។ សកម្មភាព​ដែល​អាច​ធ្វើ​ឲ្យ​សេដ្ឋកិច្ច​សកល​រងផល​ប៉ះពាល់ នៅ​ចំពោះ​មុខ​ពេល​នេះ និង​ខុស​ពី​វិធានការ​លើក​មុន ប្រទេស​ភាគ​ច្រើន​នៅ​មិន​ទាន់​បាន ឬ​មិន​បាន​ជ្រើស​យក​វិធានការ​ក្រុង​មនុស្ស​មិន​ឲ្យ​ចេញ​ពី​ផ្ទះ​ដូច​ពេល​ផ្ទុះ​កូវីដ១៩ ដំបូង​ទេ។ គួរ​បញ្ជាក់​ថា ក្នុង​រយៈ​ពេល ២ឆ្នាំ​នៃ​វិបត្តិ​កូវីដ១៩ កន្លង​ទៅ ប្រទេស​នីមួយៗ រួម​ទាំង​ពលរដ្ឋ​ម្នាក់ៗ​បាន​រៀនសូត្រ និង​មាន​បទពិសោធន៍​ច្រើន​ពី​ជំងឺ​ឆ្លង​សកល​មួយ​នេះ។ មេរៀន និង​បទពិសោធន៍​ដែល​គេ​ចង់​ផ្តោត​សំខាន់ គឺ​វិធានការ​បង្ការ និង​ការពារ រួម​ទាំង​ការ​សម្រប​ខ្លួន​រស់នៅ​តាម​គន្លង​ថ្មី។ មួយ​វិញ​ទៀត និង​ខុស​ពី​ថ្ងៃ​ផ្ទុះ​កូវីដ១៩ ដំបូង ពិភពលោក​សព្វថ្ងៃ​នេះ​កំពុង​មាន​វ៉ាក់សាំង​បង្ការ និង​ដែល​វ៉ាក់សាំង​នេះ​បាន​បង្ហាញ​ចេញ​នូវ​ប្រសិទ្ធិភាព​របស់​វា។ តែ​អ្វី​ដែល​ប្រទេស​កាន់​តែ​ច្រើន​កំពុង​ធ្វើ​ដើម្បី​ប្រឈម​ទប់​នឹង​មេរោគបំប្លែងខ្លួន​ថ្មី « អូមីក្រុង »ពេល​នេះ គឺ​ការ​បិទព្រំដែន​អាកាស​ខាង​ក្រៅ​ជាមួយ​ក្រុម​ប្រទេស​ដែល​កំពុង​មាន​វត្តមាន « អូមីក្រុង »ពិសេស​ក្រុម​ប្រទេស​អាហ្វ្រិក។ ការ​បិទ​ប្រទេស​នេះ​នឹង​ធ្វើ​ឲ្យ​ប៉ះពាល់​ខ្លាំង​ដល់​ចរាចរណ៍​ទំនិញ និង​ចរាចរណ៍​មនុស្ស ពិសេស​ចរាចរណ៍​ដឹកទំនិញ​ផ្លូវអាកាស​ដែល​នឹង​ធ្វើ​ឲ្យ​ការ​ផ្គត់ផ្គង់​ទំនិញ​ជួប​ភាព​រអាក់រអួល។ ទន្ទឹម​គ្នា​នេះ និង​ទោះ​បី​ជា​គ្មាន​វិធានការ​ក្រុង​មនុស្ស​មិន​ឲ្យ​ចេញ​ពី​ផ្ទះ​ដូច​មុន​ក៏​ដោយ ក៏​មាន​អ្នក​ខ្លះ​លេង​ហ៊ាន​ចេញ​ក្រៅ​ដើរ​សេរី​ដូច​មុន​ដោយ​បារម្ភ​ខ្លាច​ឆ្លង « អូមីក្រុង »។ គេ​បាន​សង្កេត​ឃើញ​ថា តាំង​ពី​ថ្ងៃ​ផ្ទុះ​ជំងឺ​កូវីដ១៩ ដំបូង​រហូត​មាន​មេរោគបំប្លែងខ្លួន​ជា​បន្ត​បន្ទាប់ គេ​មិន​ធ្លាប់​ឃើញ​មាន​មេរោគ​កូវីដ១៩ បំប្លែងខ្លួន​មួយ​ណា​ដែល​កំពុង​បំភ័យ និង​ធ្វើ​ឲ្យ​ពិភពលោក​ជ្រួលច្របល់​ដូច​មេរោគបំប្លែងខ្លួន​ថ្មី « អូមីក្រុង »ពេល​នេះ​ទេ។ គឺ​ភាព​ភ័យ​ខ្លាច និង​ជ្រួលច្របល់​នេះ​ហើយ​ដែល​កំពុង​ជះ​ផលវិបាក​ជា​ថ្មី​ដល់​សេដ្ឋកិច្ច​សកល។ លោក​ចូរ បៃដិន៖​គ្មាន​ហេតុផល​ដែល​ត្រូវ​ជ្រួលច្របល់​ដោយ « អូមីក្រុង » ទេ តាម​ប្រធានាធិបតី​អាមេរិក​លោក​ចូ បៃដិន គេ​ត្រូវ​បារម្ភ តែ​មិន​ត្រូវ​ជ្រួលច្របល់​នៅ​ចំពោះ​វត្តមាន​មេរោគបំប្លែងខ្លួន​ថ្មី « អូមីក្រុង » ពេល​នេះ​ទេ។ តាម​លោក​បៃដិន ចង់ ឬ​មិន​ចង់ ហើយ​យូរ ឬ​ឆាប់ មេរោគបំប្លែងខ្លួន​ថ្មី « អូមីក្រុង » ដែល​កំពុង​ឆ្លង​ចូល​ក្នុង​ប្រទេស​កាន់​តែ​ច្រើន​នឹង​ឆ្លង​ដល់​អាមេរិក​នៅ​ថ្ងៃ​ខាង​មុខ។ ការ​លើក​ឡើង​របស់​លោក​បៃដិន​មិន​ខុស​ទេ ព្រោះ​កន្លង​មក មេរោគ​បំប្លែង​ផ្សេង​ដូច​ជា « ដែលតា » ដែល​មាន​ប្រភព​នៅ​ឥណ្ឌា​ក៏​បាន​ឆ្លង​ចូល​នៅ​គ្រប់​ប្រទេស​ទាំង​អស់​ក្នុង​លោក និង​កំពុង​ក្លាយ​ជា​មេរោគបំប្លែងខ្លួន​កាច​ជាង​គេ​នៅ​ពេល​នេះ។ គេ​អាច​និយាយ​ថា មេរោគបំប្លែងខ្លួន​ថ្មី « អូមីក្រុង »ស្លូត ឬ​មួយ​ក៏​កាច​ជាង​មេរោគបំប្លែងខ្លួន « ដែលតា »។ តែ​ទោះ​ក្នុង​ករណី​ណា​ក៏​ដោយ ពិភពលោក​គួរ​ណាស់​តែ​រួម​ដៃ​គ្នា​ដើម្បី​ទប់​ស្កាត់ ពោល​មិន​គួរ​ប្រើ​វិធានការ​អន្តោម័ត និង​មិន​ត្រូវ​ជ្រួលច្របល់​ទេ។ ចូរ​កុំ​ភ្លេច​ថា ដរាប​ណា​ពិភពលោក​នៅ​មិន​ទាន់​អាច​កំចាត់​ជំងឺ​កូវីដ១៩ ទាំង​ស្រុង​បាន ដរាប​នោះ​នឹង​បន្ត​លេច​ចេញ​នូវ​មេរោគបំប្លែង​ខ្លួន​ថ្មីៗ​ជា​បន្ត​ទៀត។ ម្សិលមិញ​ជា « ដែលតា »ថ្ងៃ​នេះ​ជា « អូមីក្រុង » ចុះ​ថ្ងៃ​ស្អែក​នឹង​មាន​លេច​មេរោគបំប្លែងខ្លួន​ថ្មី​ស្អី​ទៀត។ អ៊ីចឹង​ហើយ​បាន​ជា​អង្គការ​សុខភាព​ពិភពលោក​បាន​អំពាវនាវ​យ៉ាង​ទទូច​ឲ្យ​មាន​ការ​ចាក់​វ៉ាក់សាំង​ជា​លក្ខណៈ​សកល​ក្រោម​ទ្រង់ទ្រាយ​ធំ ពោល​មិន​ត្រូវ​មាន​ការ​រើសអើង​ក្នុង​រឿង​វ៉ាក់សាំង​រវាង​ក្រុម​ប្រទេស​អ្នកមាន និង​ក្រុម​ប្រទេស​អ្នកក្រ៕
    11/30/2021
    7:23
  • ព្រឹត្តិការណ៍អន្តរជាតិប្រចាំថ្ងៃ - អង្គការ​សុខភាពពិភពលោក ចាត់ទុក មេរោគកូវីដ​បំប្លែង​ខ្លួន​ អូមីក្រុង ជាហានិភ័យខ្ពស់ខ្លាំង
    បិទ​ព្រំប្រទល់​វិញ ពង្រឹង​វិធានការ​ជា​ថ្មី ... ពិភពលោក​បន្ត​ជ្រួល​ច្របល់​ និង​ព្រួយ​បារម្ភ​កាន់​តែខ្លាំង​ឡើងៗ នៅ​ចំពោះ​មុខ​ការ​រីករាល​នៃ​មេរោគ​កូវីដ​បំប្លែងខ្លួន​ថ្មី​អូមីក្រុង​។ ប្រឈម​នឹង​ស្ថានភាព​បែប​នេះ ក្រុមប្រទេស​មហាឧស្សាហកម្ម​បានបើក​ជំនួប​ប្រជុំ​បន្ទាន់​នៅ​ថ្ងៃ ចន្ទទី ២៩​វិច្ឆិកា​នេះ នៅទីក្រុង​ឡុងដ៍​ ដើម្បី​ពិភាក្សា​ពី​ការ​វិវឌ្ឍរបស់​​អូមីក្រុង។ ចំណែក​អង្គការ​សុខភាព​ពិភពលោក​បាន​ប្រកាស​ថា អូមីក្រុង ជា​តំណាង​ហានិភ័យ ខ្ពស់​ខ្លាំង​ សម្រាប់​ពិភពលោក។ អូមីក្រុង មេរោគ​កូវីដ​បំប្លែង​ខ្លួន​ថ្មី​​លេច​ឡើង​នៅ​ប្រទេស​អាហ្វ្រិក​ខាង​ត្បូង កាលពី​ប៉ុន្មាន​ថ្ងៃ​មុន​នេះ ត្រូវ​បានអង្គការ​សុខភាពពិភពលោក ​ចាត់​ទុក​ ជា​មេរោគ ដ៏​គួរ​ព្រួយ​បារម្ភ​ ខ្លាំង​ណាស់​សម្រាប់​ពិភពលោក​ទាំងមូល។​ ខ្លាំង​ពុំ​ធ្លាប់​មានទេ គិត​​តាំង​ពីមាន​លេច​មេរោគ​កូវីដ​បំប្លែង​ខ្លួន​ដែលតាមក។ ​​ប៉ុន្តែគេ​នៅ​ពុំ​ទាន់​ដឹង​ជា​ប្រាកដ​ថា​តើ​ អូមីក្រុង កំណាច ​ឆ្លង​ខ្លាំង​ឬ​មិន​សូវ​ឆ្លង​ ជាង​ដែលតា និង​មេរោគបំប្លែង​មុន​ៗ​ កំរិត​​ណា​ឡើយ។ នៅក្នុង​ឯកសារ​បច្ចេកទេស​ ​ចេញ​ផ្សាយ​នៅ​ថ្ងៃ​ចន្ទ​ទី​២៩​វិច្ឆិកានេះ អង្គការ​សុខភាពពិភពលោកបានត្រឹម​​បញ្ជាក់​ថា បើ​យោល​ទៅ​តាម​សភាព​នៃ​ការ​បំប្លែងខ្លួន អូមីក្រុង ទំនង​ជា​​ខ្លាំង អាច​គេច​និង​​​យក​ឈ្នះ​លើ​ប្រព័ន្ធភាព​ស៊ាំ​របស់​មនុស្ស​បាន ហើយ​ទំនង​ជា​អាច​មាន​សមត្ថភាព​ចម្លង​ខ្លាំង​ទៀត។ ប្រូបាប៊ីលីតេ​នៃ​ការ​រីករាលដាល​នៅ​លើ​ពិភពលោក​អាច​ខ្ពស់​ខ្លាំង។ ហើយ​បើតាម​ទិន្នន័យ​បឋម អូមីក្រុង មាន​សញ្ញា​ហានិភ័យ​ខ្ពស់​អាចឆ្លង​លើអ្នក​ធ្លាប់​​ឆ្លង​ទៀត​បាន។ ដើម្បី​បាន​ដឹង​ជាក់​លាក់​អំពីអំណាច​ចម្លង​ ​ភាព​កំណាចរបស់​អូមីក្រុង និង​​ទស្សន៍ទាយ​បាន​អំពី​ការ​​រាតត្បាតរបស់​អូមីក្រុង​នៅលើ​ពិភពលោក ​និ​ងកំណត់​​អត្តសញ្ញាណពិត​ប្រាកដ​របស់​អូមីក្រុងបាន ​គេ​ត្រូវការ​ពេលវេលា​ជា​ច្រើន​សប្តាហ៍​ទៀត។ ក្រុមអ្នក​ស្រាវជ្រាវអ៊ីតាលីនៃ​មន្ទីរពេទ្យ​ Bambino Gesu ដ៏​ល្បី​នៅ​ក្រុង​ Rome ​បាន​ផ្សព្វផ្សាយ​រូប​ភាព​ដំបូង របស់ អូមីក្រុង ថា​មាន​ការ​​បំប្លែង​ខ្លួន​​ច្រើន​ដង​ជាង​មេរោគ​បំប្លែង​ដែល​តា ខ្លាំង​ណាស់ តែ​គេ​ត្រូវ​ការ​​សិក្សា​បន្ថែម​ជា​ច្រើន​ទៀត ​មុន​នឹង​អាច​កំណត់​បាន​ថាតើ​មេរោគ​ អូមីក្រុង កាចឬមិន​កាច ឆ្លង​ខ្លាំង​ឬ​មិន​សូវ និង​ធ្វើ​អាច​ធ្វើ​ឱ្យ​អ្នក​ជំងឺ​ធ្លាក់​ខ្លួន​ឈឺ​ធ្ងន់​កំរិតណានោះ។ មកទល់​ពេល​នេះ ពុំ​ទាន់​មាន​ករណី​ស្លាប់​ដោយ​អូមីក្រុងទេ តែមេរោគ​បំប្លែង​ខ្លួន​ថ្មី​បន្ត​បង្ហាញ​វត្តមាន​នៅក្នុង​ប្រទេស​កាន់​តែ​ច្រើន​ឡើងៗ​ ជា​រៀង​រាល់​ថ្ងៃ  និង​ជា​រៀង​រាល់​ម៉ោង។ នៅអាហ្វ្រិក​ខាង​ត្បូង​ទី​ដែល​លេច​អូមីក្រុង​ដំបូង ក្រុម​អ្នក​ជំនាញ​ព្យាករ​ថា​នឹង​មាន​ករណី​ឆ្លង​ថ្មីជាង​១ម៉ឺន​នាក់​ក្នុង​មួយ​ថ្ងៃ នៅ​​សប្តាហ៍​ខាង​មុខ។ ​បិទ​ព្រំដែន គ្មានប្រសិទ្ធភាព អង្គការ​សុខភាពពិភពលោក បាន​រំលឹក​ហើយ​រំលឹក​ទៀត​ថា​​ ការ​បិទ​ព្រំដែន មិនមែន​ជា​មធ្យោបាយ​ទប់​ស្កាត់​ការ​រីក​រាលដាល​នៃកូវីដ ប្រកប​ដោយ​ប្រសិទ្ធភាព​ទេ។ ក្នុង​អារម្មណ៍​ថា​រង​ទណ្ឌកម្ម​ ដោយសារ​​ភាព​ស្មោះត្រង់​ប្រកាស​ប្រាប់​ពី​មេរោគកូវីដ​បំប្លែងខ្លួន​ថ្មី ប្រទេស​អាហ្វ្រិក​ខាង​ត្បូង​ផ្ទាល់​ ក៏​បាន​អំពាវនា​វឱ្យ​គ្រប់​ប្រទេស​ទាំង​បើក​ចំហ​ព្រំដែន​ វិញ​ ភ្លាមនិង​ជា​បន្ទាន់។ ប៉ុន្តែ​គ្រាន់​តែ​បាន​ទទួល​ដំណឹង​ពី​អាហ្វ្រិក​ខា​ងត្បូង​​ថា​បាន​រក​ឃើញ​មេរោគកូវីដ​បំប្លែង​ខ្លួន​ថ្មី​ អូមីក្រុង ភ្លាម បណ្តា​ប្រទេស​នៅ​ទ្វីប​អឺរ៉ុប សហរដ្ឋ​អាមេរិក អ៊ីស្រាអែល .... បាន​ប្រកាស​បិទ​ជើងហោះហើរ​មក​ពី​អាហ្វ្រិកខាង​ត្បូង​ភ្លាម។ ឥលូវមាន​ប្រទេស​ជា​ច្រើន​បន្ថែម​ទៀត បាន​សម្រេច​បិទ​ការ​ហោះហើរជាមួយ​អាហ្វ្រិក​ខាង​ត្បូង និង​អាហ្វ្រិក​មួយ​ចំនួន។ ហើយ​មា​នប្រទេស​ខ្លះ​ទៀត សម្រេច​បិទ​ព្រំ​ប្រទល់​វិញ​តែ​ម្តង មាន​ជា​អាទិ៍ ជប៉ុន​។ បន្ធូរ​បន្ថយ​វិធានការ​បាន​បីសប្តាហ៍​ ​ជប៉ុន​បាន​ប្រកាស​បិទ​ព្រំដែន​មិន​ទទួល​ទេសចរ​បរទេស​វិញ ចាប់​ពី​ថ្ងៃ​អង្គារ​ទី ៣០​វិច្ឆិកា​ទៅ។ អូស្ត្រាលីប្រកាស​លើក​ពេល​បើក​ព្រំដែន​ទទួល​និស្សិត​និង​ពលករ​បរទេស ដែលគ្រោង​បើក​ចាប់​ពីថ្ងៃទី ១ធ្នូ​ទៅ។ ហ្វីលីពីន​ក៏​ផ្អាក​ផែនការ​បើក​ប្រទេស​ទទួលភ្ញៀវ​​ទេសចរបរទេស​ចាក់​ថ្នាំបង្ការ​រួច​មួយ​រយៈ​សិន​ទៀតដែរ។ ម៉ារ៉ុក សម្រេច​បិទ​ព្រំដែន​ផ្អាក​ទំនាក់ទំនង​ផ្លូវអាកាស​ទាំង​ស្រុង​តែម្តង រយៈ​ពេល​ពីរ​សប្តាហ៍ ចាប់ពី​ស្អែក​ទៅ ដោយ​សំអាង​ថា​ប្រទេស​គ្រប់គ្រង​កូវីដ​បាន​ល្អ​ហើយ មិន​ចង់​ឱ្យ​រលក​ចម្លង​ថ្មី​កើត​ឡើង​​ទៀតទេ។ នៅអឺរ៉ុប​ រដ្ឋមន្ត្រីក្រសួង​សុខាភិបាល​នៃ​ក្រុមប្រទេស​មហាឧស្សាហកម្ម​G៧ បារាំង អង់គ្លេស អាមេរិក ជប៉ុន កាណាដា និង​អ៊ីតាលី បាន​បើក​​ប្រជុំ​​​បន្ទាន់​នៅ​ក្រុង​ឡុងដ៍​ថ្ងៃ​នេះ ដើម្បី​ពិភាក្សា​អំពី​ដំណើរ​វិវឌ្ឍ​របស់​អូមីក្រុង។ ក្នុង​ប្រទេស​ដែល​រកឃើញ​មាន​ករណី​កូវីដ​អូមីក្រុង មកដល់​ហើយ អាជ្ញាធរ​សុទ្ធ​តែ​បាន​រឹត​បន្តឹង​វិធានការ​ឡើង​វិញ។ ថ្វីបើ​បារាំង​គ្មាន​គម្រោង​បិទ​ព្រំដែន​ផ្ទៃ​ក្នុង​អឺរ៉ុប​ទាំង​ស្រុងមែន តែបារាំង​​តម្រូវ​ឱ្យ​អ្នក​ជាប់ពាក់ព័ន្ធ​នឹង​ករណី​វិជ្ជមាន​អូមីក្រុង ត្រូវ​ធ្វើ​ចត្តាឡីស័ក ទោះ​បាន​ចាក់វ៉ាក់សាំង​ពេញលេញ​ហើយ​ក៏​ដោយ។ នៅអង់គ្លេស អ្នក​ដំណើរ​បរទេស​ត្រូវ​ធ្វើ​​តេស្ត​កូវីដ នៅ​ពីរ​ថ្ងៃ​ក្រោយ​មក​ដល់​ និង​ត្រូវ​នៅ​ដាច់​ដោយ​ឡែក​ពីគេ ក្នុង​ពេល​រង់ចាំ​លទ្ធផល។ ​​អូមីក្រុង និង​ វ៉ាក់សាំង មិនទាន់​ស្គាល់​អត្តសញ្ញាណ​ពិត​ប្រាកដ​របស់​អូមីក្រុង គេ​ក៏​​នៅ​មិន​ទាន់​ដឹង​ថា​តើ​វ៉ាក់សាំង​ដែល​ពិភពលោក​មាន​ប្រើ​នា​ពេល​បច្ចុប្បន្ន​នេះ អាច​ការពារ​និង​កំរិត​ការ​ឆ្លង​អូមីក្រុង ហើយ​បើ​ឆ្លង​តើ​វ៉ាក់សាំង​អាច​ការពារ​មិន​ឱ្យ​ធ្លាក់​ខ្លួន​ឈឺធ្ងន់​បាន​ប៉ុនណា ឬ​ក៏​គ្រាន់តែ​មាន​រោគ​សញ្ញា​ខ្លាំង។ ប៉ុន្តែ​ខាង​មន្ទីរ​ពិសោធន៍ឱសថ មិន​ថា​ក្រុមហ៊ុន​ AstraZeneca Pfizer/BioNtech Moderna និង​Novavax ទេ​ សុទ្ធ​តែ​ប្រកាស​អះអាង​ថា​មាន​ទំនុក​ចិត្ត​លើ​សមត្ថភាព​សម្រួល​វ៉ាក់សាំង​ប្រឆាំង​កូវីដ​របស់​ខ្លួន​បាន​ សម្រាប់​យក​ទៅ​ទប់​ទល់​នឹង​អូមីក្រុង។ បើ​តាម​លោកស្រី​ប្រធាន​គណៈកម្មការ​អឺរ៉ុប មន្ទីរ​ពិសោធន៍​នីមួយៗ​ត្រូវ​ការ​ពេល​វេលា​យ៉ាង​ហោច​ពីរទៅ​២​សប្តាហ៍​ ទើបអាច​សម្រេច​បាន​ថា​ត្រូវ​កែសម្រួល​វ៉ាក់សាំង​របស់​ពួកគេ​ឬ​អត់។ ក្នុង​ពេល​រង់ចាំ​ ប្រទេស​ខ្លះ​បាន​ជំរុញ​និង​ពន្លឿន​យុទ្ធនាការ​ចាក់​ថ្នាំ បង្ការ​ ដូស​ទីបី ហើយ​វិធី​ការពារ​និង​ទប់​ទល់​ដ៏​ប្រសើរ​ជាង​គេ ដើម្បី​បាន​ចំណេញ​ពេលវេលា និង​ កុំ​ឱ្យ​ការ​ចម្លង​រាតត្បាត​ ស្ទុះ​ឡើង​លឿន​ខ្លាំង គឺ​គ្មា​ន​អ្វី ក្រៅ​ពី​បង្កើន​ការ​ប្រុង​ប្រយ័ត្ន​ទ្វេឡើង និង​បន្តប្រកាន់​ខ្ជាប់​វិន័យការពារ​ខ្លួន ដោយ ​ពាក់​ម៉ាស់ ក្នុង​ទី​បិទ​ជិត ក្នុង​ទី​ប្រជុំ​ជន រក្សា​គន្លាត ឧស្សាហ៍​បើក​ទ្វារ​បង្អួចផ្ទះសម្បែងការិយាល័យ​ធ្វើការ ដើម្បី​ឱ្យ​ប្តូរ​ផ្លាស់​​ខ្យល់​បរិយាកាស៕
    11/29/2021
    7:05

Über ព្រឹត្តិការណ៍អន្តរជាតិប្រចាំថ្ងៃ

Sender-Website

Hören Sie ព្រឹត្តិការណ៍អន្តរជាតិប្រចាំថ្ងៃ, ព្រឹត្តិការណ៍​កម្ពុជា​ប្រចាំថ្ងៃ und viele andere Radiosender aus aller Welt mit der radio.de-App

ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Jetzt kostenlos herunterladen und einfach Radio & Podcasts hören.

Google Play StoreApp Store

ព្រឹត្តិការណ៍អន្តរជាតិប្រចាំថ្ងៃ: Zugehörige Podcasts

ព្រឹត្តិការណ៍អន្តរជាតិប្រចាំថ្ងៃ: Zugehörige Sender

Information

Wegen Einschränkungen Ihres Browsers ist dieser Sender auf unserer Website leider nicht direkt abspielbar.

Sie können den Sender alternativ hier im radio.de Popup-Player abspielen.

Radio