Partner im RedaktionsNetzwerk Deutschland
Radio Logo
Der Stream des Senders startet in {time} Sek.
StartseitePodcastsNachrichten
ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Podcast ព្រឹត្តិការណ៍អន្តរជាតិប្រចាំថ្ងៃ
Podcast ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

hinzufügen

Verfügbare Folgen

5 von 24
  • ជំហររារែករបស់សហគមន៍អន្តរជាតិ នៅក្រោយ​រុស្ស៊ី​ប្រកាស​កាត់យក​តំបន់ទាំង៤​របស់​អ៊ុយក្រែន
    រុស្ស៊ី​បាន​លើក​ដៃវេតូ មិន​ឲ្យ​ក្រុមប្រឹក្សា​សន្តិសុខ​បោះឆ្នោត​លើ​សេចក្តីសម្រេច​ថ្កោលទោស ការបោះឆ្នោតប្រជាមតិខុសច្បាប់ ដើម្បី​កាត់យកទឹកដី​ទាំង​៤​របស់​អ៊ុយក្រែន។ បន្ទាប់ពី​ធ្វើ​សង្រ្គាមឈ្លានពាន​អ៊ុយក្រែន ក្នុងហេតុផល​ការពារ​អ្នកនិយាយភាសារុស្ស៊ី ពីការធ្វើទុក្ខបុកម្នេញ​របស់​ទាហាន​ណាហ្ស៊ីថ្មី នៅ​អ៊ុយក្រែន រុស្ស៊ី នៅទីបំផុត បានរំលោភកាត់យក​តំបន់​ចំនួន​៤​របស់​អ៊ុយក្រែន ទៅ​ដាក់​ក្នុង​ផែនទី​របស់ខ្លួន។ បន្ទាប់ពីនេះ តើ​នឹង​មាន​រឿងអ្វីកើតឡើងបន្ត? នៅក្នុងការបោះឆ្នោត​របស់​ក្រុមប្រឹក្សា​សន្តិសុខ​អង្គការសហប្រជាជាតិ កាលពីថ្ងៃ​សុក្រ រុស្ស៊ី​លើកដៃ​វេតូ​តែម្នាក់ឯង​ប្រឆាំង​មិនឲ្យចេញសេចក្តីសម្រេច ថ្កោលទោស​ការកាត់បញ្ចូល​ទឹកដីអ៊ុយក្រែន ទៅជាដែនដី​រុស្ស៊ី។ ប្រទេស​សមាជិក​ក្រុមប្រឹក្សា​សន្តិសុខ​ចំនួន ១០បាន បោះឆ្នោត​គាំទ្រ​សេចក្តីសម្រេច​ដែលស្នើឡើង​ដោយ​អាមេរិក និង​អាល់បានី។ ប្រទេស​៤ ចិន ឥណ្ឌា ប្រេស៊ីល និងហ្កាបុង បោះឆ្នោត​អនុប្បវាទ។ ក្រុមប្រឹក្សា​សន្តិសុខ បរាជ័យ មិនអាច​ថ្កោលទោស រុស្ស៊ី បន្ទាប់ពី​ប្រធានាធិបតី​រុស្ស៊ី លោក​ពូទីន​បាន​ប្រកាស​ជាឱឡារិក ដាក់បញ្ចូល​ជាផ្លូវការ ទឹកដី​អ៊ុយក្រែន ចំនួន ៤ ទៅក្នុងទឹកដី​រុស្ស៊ី។ ដូច​កាល​រុស្ស៊ី កាត់យក​ទឹកដី​គ្រីមេ របស់​អ៊ុយក្រែន កាលពីឆ្នាំ ២០១៤ សហគមន៍អន្តរជាតិ​បាន​បញ្ចេញ​សំឡេង​ថ្កោលទោស ចំណែក ប្រទេស​លោកខាងលិច ប្រកាស​ដាក់ទណ្ឌកម្ម​បន្ថែម​ទៀត ទៅលើ​រុស្ស៊ី ដែល​ប្រកាស​កាត់យក​ទឹកដី ៤​ទៀត របស់​អ៊ុយក្រែន។ ប៉ុន្តែ ខុសស្រឡះពីការកាត់យកទឹកដី​គ្រីមេ របស់អ៊ុយក្រែន ដែល​រុស្ស៊ី​បានធ្វើឡើង​ដោយ​គ្មានសង្រ្គាមបង្ហូរឈាម កាលពីឆ្នាំ ២០១៤ គេ​រំពឹងថា ការកាត់យកទឹកដី​អ៊ុយក្រែន ចំនួន ៤ នៅក្នុងបរិបទ​សង្រ្គាម​ប្រយុទ្ធ​គ្នា ដែលកំពុងបន្ត​ក្នុងទឹកដី​អ៊ុយក្រែន នឹង​អាច​ធ្វើឲ្យ​សហគមន៍​អន្តរជាតិ ប្រតិកម្ម ដាក់សម្ពាធ​លើ​រុស្ស៊ី ជាពិសេស​បណ្តាប្រទេសមួយចំនួន ដូចជា​ចិន ឥណ្ឌា និង​បណ្តាប្រទេស​នៅអាហ្វ្រិក ជាច្រើន ដែល ធ្លាប់​នៅ​ស្ងៀម​មិនថ្កោលទោស​រុស្ស៊ី ដែល​បើកធ្វើ​សង្រ្គាមឈ្លានពាន​អ៊ុយក្រែន កាលពី៧ខែមុន។ សង្រ្គាមរុស្ស៊ី​ឈ្លានពាន​អ៊ុយក្រែន នៅពេលនេះ​បាន​វិវឌ្ឍ ឈានទៅដល់​ដំណាក់កាលថ្មីមួយ​ទៀត។ ដើម្បី​ការពារខ្លួន រុស្ស៊ី​ធ្លាប់បាន​ប្រកាស​បើក​ប្រតិបត្តិការ​យោធា ពិសេស ដើម្បី​ការពារ​ប្រជាជន​និយាយ​ភាសារុស្ស៊ី នៅអ៊ុយក្រែន ដែល​ម៉ូស្គូ​អះអាងថា រងការរើសអើង ប្រល័យពូជសាសន៍ ពីអាជ្ញាធរ​អ៊ុយក្រែន។ ប៉ុន្តែ នៅពេល លោក​ពូទីន ប្រកាស​កាត់យក​ទឹកដី របស់អ៊ុយក្រែន ៤បន្ថែមទៀត ដោយ​ក្នុងនោះ ទឹកដី​២ នៅភាគខាងត្បូង ត្រូវ​ឈ្លានពាន​ ចូលកាន់កាប់​ដោយ​កងទ័ព​រុស្ស៊ី យ៉ាងដូច្នេះ គេ​លែង​ជឿជាក់​លើ​រុស្ស៊ី របស់​លោកពូទីន ហើយ​គេ​បារម្ភថា លោកពូទីន​នឹង​មិនបញ្ឈប់​ត្រឹមកាត់យក​ទឹកដី​អ៊ុយក្រែន​ទាំង​៤​របស់​អ៊ុយក្រែន​នេះទេ។ ប្រទេស​អតីត​សហភាព​សូវៀត ជាច្រើន ដែលនៅ​អឺរ៉ុប និង​នៅ​អាស៊ី​កណ្តាល​ខ្លាច​ថា មហិច្ឆតា​របស់​លោក​ពូទីន នៅអ៊ុយក្រែន នឹង​អាច​រាលដាល​ចូល​ដល់​ពួកគេ នៅថ្ងៃ​ខាងមុខ បើសិន​លោក​ពូទីនចេះតែ​កាត់យក​ទឹកដី​របស់​អ៊ុយក្រែន ដោយ​ខ្លាចរអែង​យ៉ាងដូច្នេះ។ ចំណែក ប្រទេស​ផ្សេងទៀត ដូចជា​ចិន និង​ឥណ្ឌា ទោះជា​ដៃគូ ពាណិជ្ជកម្ម ជាមួយ រុស្ស៊ី កំពុងបារម្ភ​ខ្លាច​ថា មហិច្ឆតា​ធ្វើសង្រ្គាម​របស់​លោកពូទីន នៅអ៊ុយក្រែន នឹង​អាច​ទៅ​បង្ក​ផ្ទុះ​សង្រ្គាម​ធំបាន។ រុស្ស៊ី​របស់​លោកពូទីន​បាន​ប្រកាសសាជាថ្មី រុស្ស៊ី នឹង​ប្រើគ្រប់​មធ្យោបាយ ដែលនៅ​ក្នុងនោះ មានផងដែរ ការប្រើអាវុធនុយក្លេអ៊ែរ ដើម្បី​ការពារ​ដែនដី​អ៊ុយក្រែន ដែលត្រូវ​កាត់បញ្ចូល​មកជា​ទឹកដី​របស់​រុស្ស៊ី។ នៅក្នុង​ការថ្លែងកាលពី​ថ្ងៃ​សុក្រ ប្រធានាធិបតី​អាមេរិក លោក​ចូ បៃដិន​និយាយ​ថា អាមេរិក និង​សម្ព័ន្ធមិត្ត​មិន​ចុះចាញ់​ពាក្យសម្លុត​របស់​លោក​ពូទីន និង​ថា អូតង់​នឹង​ការពារ​ដែនដី​របស់ខ្លួន មិនឲ្យបាត់បង់ សូម្បី ១សង់ទីម៉ែត្រ។ ទីប្រឹក្សា​សន្តិសុខ​របស់ប្រធានាធិបតីអាមេរិក លោក​Jack Sullivan បាន​អះអាងដែរថា កងទ័ពអាមេរិក​នៅអឺរ៉ុប ត្រៀមខ្លួន​ទប់ទល់​រាល់គ្រប់ហេតុការណ៍។ ដោយ​លើកឡើង​ពី​ជំនួយថ្មី ១២ពាន់​លាន​ដុល្លារ ដែល​ព្រឹទ្ធសភា​អាមេរិក​បាន​បោះឆ្នោត​អនុម័ត​កាលពីថ្ងៃ​ព្រហស្បតិ៍ ប្រធានាធិបតី​អាមេរិក​បាន​ប្រកាស​សន្យា​បន្ត​ផ្តល់ជំនួយ​យោធា ដើម្បី​ឲ្យអ៊ុយក្រែន​នៅបន្តប្រយុទ្ធ​ការពារ​ខ្លួន​តទៅទៀត។ លោកចូ បៃដិន​នៅបាន​និយាយ​ចាត់ទុក ពិធីបុណ្យ​អបអរ​របស់​រុស្ស៊ី ក្នុងការដាក់បញ្ចូលជាផ្លូវការ​ដែនដី​របស់​អ៊ុយក្រែន ទៅក្នុង​ទឹកដី​រុស្ស៊ី ថា ជា​ឆាកល្ខោន និង​ជា​ការឆ្លុះបញ្ចាំង​ពីការលំបាក​របស់​កងទ័ព​រុស្ស៊ីក្នុងសមរភូមិ។ លោកពូទីន​ប្រាប់​ឲ្យ​អ៊ុយក្រែនទម្លាក់អាវុធចុះចាញ់ និង​ចូលតុចរចា ក្រោយ​ចុះហត្ថលេខា​លើ​ក្រឹត្យ​ដាក់បញ្ចូលទឹកដី​ទាំង​៤​របស់​អ៊ុយក្រែន កាលពីថ្ងៃ​ម្សិលមិញ ប្រធានាធិបតី​រុស្ស៊ី​បាននិយាយប្រាប់​ឲ្យអ៊ុយក្រែន ទម្លាក់អាវុធ និង​ត្រលប់ចូលតុចរចា។ អ្វីដែលគេ​ដឹង លឺច្បាស់​ពី​មាត់​របស់​លោក​ពូទីន គឺ​រុស្ស៊ី​នឹង​មិន​ចរចា ពី​តំបន់​ទាំង​៤​របស់​អ៊ុយក្រែន ដែល​ត្រូវបានចាត់ចូល ជា​ផ្លូវការ​ក្នុងដែនដី​របស់​រុស្ស៊ី។ តាម​លោកពូទីន ទឹកដីទាំង​៤​របស់​អ៊ុយក្រែន​ទាំង ៤ បាន​ក្លាយជាដែនដី​របស់​រុស្ស៊ី​រួចហើយនោះ នឹងស្ថិតនៅ​ជា​ដែនដី​របស់​រុស្ស៊ី ជា​រៀងរហូត​ដោយ​គ្មាន ការប្រែប្រួល សើរើ​អ្វីទាំងអស់។ ដោយវាយដណ្តើមយកបាន ហើយនិងប្រកាសដាក់បញ្ចូល​ទឹកដីទាំង​៤​របស់​អ៊ុយក្រែន បន្ថែមទៀត យ៉ាងដូច្នេះ រុស្ស៊ី របស់​លោកពូទីន​សង្ឃឹមថា ខ្លួន មាន​ទឹកមាត់ប្រៃ​ដើម្បី​ចរចា ដាក់​សម្ពាធ​លើ​អ៊ុយក្រែន។ ក្នុងករណី​ថា អ៊ុយក្រែន យល់ព្រម​ចរចា ដើម្បី​បញ្ឈប់សង្រ្គាម នៅពេលនេះ រុស្ស៊ី ចំណេញច្រើន សង្រ្គាមពង្រីកទឹកដី ព្រោះថា ទឹកដីរបស់​អ៊ុយក្រែន ដែលរុស្ស៊ី ទើប​កាត់បញ្ចូល ជាផ្លូវការ កាលពីថ្ងៃ​សុក្រ នឹង​ក្លាយជា​ដែនដី​របស់​រុស្ស៊ី ដោយ​គ្មាន​ការប្រកែកបាន។ តើ​អូតង់​នឹង​សម្រេចចិត្ត​យ៉ាងណា? ប្រធានាធិបតី​អ៊ុយក្រែន លោក​ហ្សេឡេនស្គី​បាន​បដិសេធ​ដាច់អហង្កា មិន​ចរចា​ជាមួយ​លោកពូទីន និង​ថា អ៊ុយក្រែននឹង​ចរចាជាមួយ​ប្រធានាធិបតី​ថ្មី​របស់​រុស្ស៊ី​តែប៉ុណ្ណោះ។ នៅក្រោយ រុស្ស៊ី ប្រកាស​ដាក់បញ្ចូល ជាផ្លូវការ ទឹកដី​អ៊ុយក្រែន​ទៅក្នុង​ទឹកដី​រុស្ស៊ី យ៉ាងដូច្នេះ ប្រធានាធិបតី​អ៊ុយក្រែន​បានប្រកាស​ពន្លឿនដំណើរការ​ដាក់ពាក្យសុំចូល​ជា​សមាជិក​របស់អូតង់។ ការប្រកាស​ដាក់បញ្ចូល​ជាផ្លូវការ ទឹកដី​ចំនួន​៤​របស់​អ៊ុយក្រែន ទៅក្នុងផែនទី​សហព័ន្ធរុស្ស៊ី​អាច​ធ្វើ​ឲ្យ​សង្រ្គាម​អ៊ុយក្រែន ប្រែប្រួល ប៉ុន្តែ សម្រាប់ ភាគី​អ៊ុយក្រែន មហិច្ឆតា​របស់​រុស្ស៊ី មិនបាន​ធ្វើ​ឲ្យ​អ៊ុយក្រែន​ផ្លាស់ប្តូរ​យុទ្ធសាស្រ្ត​ធ្វើ​សង្រ្គាម​របស់ខ្លួនឡើយ។ កងទ័ព​អ៊ុយក្រែន​បាន​ប្រកាស​ហើយ​ថា គេ​នៅតែបន្តប្រយុទ្ធ ដើម្បី​វាយដណ្តើម​យក​ទឹកដី​របស់ខ្លួន មកវិញ បើទោះបី​ជា ទឹកដី​ទាំងនោះ ត្រូវ​រុស្ស៊ី​កាត់យក​ធ្វើជា​ដែនដី​របស់ខ្លួន​ក៏ដោយ។ អ៊ុយក្រែន​មិនចុះញ៉ម​នឹង​ការសម្លុត របស់លោកពូទីន ដែល​ទាមទារ​ឲ្យ​អ៊ុយក្រែន ទម្លាក់អាវុធ និង​ត្រលប់​ចូលតុចរចា។ សម្រាប់​អ៊ុយក្រែន ដែលឃើញ រុស្ស៊ី លេបយកទឹកដី របស់ខ្លួន ជាមួយ​សង្រ្គាមឈ្លានពាន អ៊ុយក្រែន​គ្មានអ្វី​ត្រូវមកចរចា​ជាមួយរុស្ស៊ី របស់​លោកពូទីនទៀតនោះទេ។ ប្រឈម​នឹង​ការដាក់សម្ពាធ​របស់​រុស្ស៊ី ប្រធានាធិបតី​អ៊ុយក្រែន បាន​ងាក​ទៅរកជំនួយ ​ពី​សម្ព័ន្ធមិត្ត​លោកខាងលិច ដើម្បី​សុំ​ឲ្យ​ខ្លួន​បានទទួល​ខ្នងបង្អែក​ពីអូតង់។ នៅ​ថ្ងៃ​សុក្រ​ថា ប្រធានាធិបតី អ៊ុយក្រែន បាននិយាយ​ថា អ៊ុយក្រែន​ដាក់ពាក្យ សុំចូលជាសមាជិក​របស់អូតង់ និង​សុំ​ឲ្យអូតង់​ជួយ​ពន្លឿន​ដំណើរការ​ចូលជា​សមាជិក​របស់​អ៊ុយក្រែន​ទៅក្នុងអង្គការ​អូតង់។ ប្រមុខការបរទេស​អាមេរិក ដែលបានធ្វើ​ទស្សនកិច្ច​នៅកាណាដា អះអាងថា អាមេរិក​គាំទ្រ​ឲ្យអ៊ុយក្រែន ចូលជាសមាជិក​របស់អូតង់ ប៉ុន្តែ លោកទទួលស្គាល់ថា ដំណើរការចូលជា​សមាជិក​អូតង់​នឹង​ត្រូវការពេលវេលាយូរ។ អគ្គលេខាធិការ​អង្គការ​អូតង់ក៏មាន​ជំហរដូចគ្នា​នេះដែរ។ សម្រាប់​អគ្គលេខាធិការ​អូតង់ លោក Jen Stoltenberg ​រាល់ប្រទេស​ប្រជាធិបតេយ្យ​នៅអឺរ៉ុប​មាន​សិទ្ធិសុំ​ចូលជា​សមាជិក​របស់អូតង់។ អូតង់​បើកទ្វារជានិច្ច ប៉ុន្តែ ការសម្រេចចិត្តយ៉ាងណា ត្រូវ​អាស្រ័យ​លើ​ការបោះឆ្នោត​ជាឯកច្ឆន្ទ​របស់​ប្រទេស​សមាជិក​ទាំង​៣០​របស់​អូតង់។ អ៊ុយក្រែន ចង់​ចូលជាសមាជិករបស់អូតង់ ដើម្បី​បានអូតង់ជាខ្នងបង្អែក សម្រាប់​ទប់ទល់​នឹង​ការឈ្លានពាន​របស់​រុស្ស៊ី ប៉ុន្តែ មិនមែនមានន័យថា អូតង់​យល់ព្រមនោះដែរ ព្រោះ​ធ្វើដូច្នេះ គឺ​ប្រៀបដូចជា អូតង់​ត្រូវ​ប្រឈម​មុខ​ធ្វើសង្រ្គាមដោយផ្ទាល់ជាមួយ​រុស្ស៊ី ដែលនឹង​ផ្ទុះចេញទៅជា​សង្រ្គាមលោកទី​៣។ នៅក្នុងដំណាក់កាលនេះ អូតង់ និង អាមេរិក​បដិសេធ​មិន​ប្រលូក​ចូល​ផ្ទាល់​ ក្នុង​សង្រ្គាម អ៊ុយក្រែន ប៉ុន្តែ បាន​ជួយ​ផ្តល់សព្វាវុធ និង​បណ្តុះបណ្តាល​ទាហាន​អ៊ុយក្រែន​ឲ្យ​ប្រយុទ្ធ​ដណ្តើម​ទឹកដី​ពី​រុស្ស៊ីមកវិញ។ នៅក្នុងសន្និសីទកាសែត កាលពីថ្ងៃ​សុក្រ នៅទីក្រុង​ព្រុចសែល អគ្គលេខាធិការ​អូតង់ លោក Jen Stoltenberg ​ថ្កោលទោស ចាត់ទុក​ការកាត់យកទឹកដី​របស់​អ៊ុយក្រែន ថា ជារឿងខុសច្បាប់ និង​ថា អូតង់​មិន​ទទួលស្គាល់​ទឹកដី​ទាំងនោះជា​ទឹកដី​របស់​រុស្ស៊ី។ តាមប្រមុខអង្គការ​អូតង់ អ៊ុយក្រែន​មាន​សិទ្ធិ​ប្រើកម្លាំង ដើម្បី​វាយដណ្តើម​យកទឹកដី ដែល​រុស្ស៊ី​បាន​ឈ្លានពាន​កាន់កាប់។ ​លោក Jen Stoltenberg នៅបាន​អះអាងថា អូតង់​នឹង​ជួយ​គាំទ្រ ដើម្បី​ឲ្យអ៊ុយក្រែន​រំដោះយក​ទឹកដី​ពី​ដៃ​កងទ័ពរុស្ស៊ីមកវិញ៕
    10/1/2022
    6:48
  • លោកពូទីន ប្រកាស​បញ្ចូល​តំបន់​ទាំង៤​របស់​អ៊ុយក្រែន​ មកក្នុង​ទឹកដី​​រុស្ស៊ី​ជាផ្លូវការ
    សង្គ្រាមនៅអ៊ុយក្រែន កំពុងតែឈានចូលដល់ដំណាក់កាលថ្មីមួយទៀត ដ៏គ្រោះថ្នាក់បំផុត។ ក្រោយ​ការបោះឆ្នោត​ប្រជាមតិ ដែលរុស្ស៊ីបានរៀបចំធ្វើ នៅតំបន់ទាំង៤របស់អ៊ុយក្រែន គឺតំបន់ ដូណេតស៍ តំបន់លូហ្កង់ស្ក៍ តំបន់ហ្សាប៉ូរីចា និងតំបន់ឃឺរសិន នៅថ្ងៃសុក្រទី៣០កញ្ញានេះ​ លោក​ពូទីន​ បាន​ប្រកាស​​បញ្ចូល​តំបន់ទាំងបួន​នេះ ជាទឹករបស់​រុស្ស៊ី​ជាផ្លូវការ​។ ក្រុម​ប្រទេសលោកខាងលិច សម្ព័ន្ធមិត្តរបស់អ៊ុយក្រែន បានអះអាងថា គ្មានថ្ងៃដែលគេនឹងទទួលស្គាល់ការពង្រីកទឹក​ដីរបស់រុស្ស៊ី ដែលបានមកពី​អំពើប្លន់ស្រស់ៗបែបនេះនោះទេ។ ដូចយើងបាន​ដឹងហើយ ថាកាលពីពេលថ្មីៗនេះ លោកពូទីនបានចេញបញ្ជាឲ្យរៀបចំ ការធ្វើ​ប្រជាមតិយ៉ាងប្រញប់ប្រញាល់បំផុត នៅតំបន់ទាំង៤របស់អ៊ុយក្រែន គឺតំបន់ ដូណេតស៍ តំបន់លូហ្កង់ស្ក៍ តំបន់ឃឺសិន និងតំបន់ហ្សាប៉ូរីចា បន្ទាប់ពីបានសង្កេតឃើញកងទ័ពអ៊ុយក្រែនកំពុងមានប្រៀបខ្លាំង។ ជាការធ្វើប្រជាមតិ​ ដែលរដ្ឋអំណាចរុស្ស៊ី  បានអះអាងថា ដើម្បី​សួរទៅ​ប្រជាពលរដ្ឋនៅតំបន់ទាំង៤នោះ ថាយល់ព្រមឲ្យ​ទឹកដី​ខ្លួន ​ចូលមកក្នុង​ទឹកដីសហព័ន្ធរុស្ស៊ីដែរឬទេ។ ក៏ប៉ុន្តែ ការធ្វើប្រជាមតិនេះ គឺត្រូវបាន​អ៊ុយក្រែន និងក្រុមប្រទេសលោក​ខាងលិចបរិហារថ្កោលទោសខ្លាំងណាស់ ថាវាជាការរៀបចំឆាកល្ខោន ដើម្បីប្លន់យកទឹកដីអ៊ុយក្រែន យ៉ាងស្រស់​ៗ​តែម្តង​។ តែយ៉ាងណា គ្មានអ្វីអាចបង្អាក់ដំណើរដ៏មានៈ របស់លោកពូទីនបានទេ។ តំបន់លូហ្កង់ស្ក៍ និងតំបន់ដូណេតស៍ ត្រូវបាន​លោក​ពូទីន ចេញក្រិត្យ​ទទួលស្គាល់ឯករាជ្យ​រួចហើយ កាលពី​ចុងខែ​កុម្ភៈ មុនពេល​លើកទ័ពចូលធ្វើសង្គ្រាមនៅអ៊ុយក្រែន​។ ហើយ​កាលពីថ្ងៃព្រហស្បតិ៍ម្សិលមិញនេះ លោកពូទីន បានចេញក្រិត្យ​មួយទៀត ទទួលស្គាល់ ឯករាជ្យ តំបន់ហ្សាប៉ូរីចា និង​តំបន់​ឃឺសិន។ ជំហានបន្ទាប់ចុងក្រោយនាពេលនេះ គឺការប្រកាស បញ្ចូល​តំបន់ឯករាជ្យ​ទាំង៤នេះ មកក្នុងទឹកដីរបស់សហព័ន្ធរុស្ស៊ី។ ផ្អែកតាមការឲ្យដឹងពី លោក Dmitri Peskov អ្នកនាំពាក្យ​វិមានក្រឹមឡាំង គឺនៅ​ម៉ោង៣រសៀល​ ម៉ោងនៅម៉ូស្គូ ដែលត្រូវជាម៉ោង១២ថ្ងៃត្រង់ ម៉ោងសកល កម្មវិធីផ្លូវការ​​ត្រូវចាប់ផ្តើម ជាមួយនឹង “សុន្ទរថាដ៏វែង និងដ៏​សំខាន់” របស់​​លោក​​ប្រធានាធិបតីពូទីន។ មេដឹកនាំតំបន់ទាំង៤ ដែលរុស្ស៊ីបានលើក​បន្តុបនោះ ក៏មានវត្តមាន នៅក្នុងកម្មវិធីដ៏មហាឱឡាឫកនេះដែរ។ ចប់សុន្ទរកថា លោកពូទីន នឹងចុះហត្ថលេខា លើ “សន្ធិសញ្ញាបញ្ចូល​ដែនដីថ្មី មកក្នុង​ទឹកដីរបស់សហព័ន្ធរុស្ស៊ី”​។ ល្ងាចថ្ងៃសុក្រ​ នៅខាងក្រៅវិមានក្រឹមឡាំង គេនឹង​មានរៀបចំកម្មវិធីប្រគុំតន្ត្រីអបអរសាទរ ស្វាគមន៍​សមាជិកថ្មី នៃដែនដីរបស់រុស្ស៊ី ដែលតាមការប៉ាន់ស្មាន​ លោកពូទីន អាចនឹងមានវត្តមានចូលរួមដែរ​​។ កាត់បញ្ជូល​ដែនដីទាំងស្រុងនៃតំបន់ទាំង៤ ឬក៏​ផ្នែកដែលស្ថិតក្រោមការគ្រប់គ្រងរបស់កងទ័ពរុស្ស៊ី? តើរុស្ស៊ីនឹងចាត់ទុកផ្ទៃដីទាំងស្រុង​ នៃតំបន់ទាំង៤នោះ ជារបស់ខ្លួន ឬក៏តែផ្នែកដែល​កងទ័ពរុស្ស៊ីគ្រប់គ្រង? ត្រង់នេះហើយ ដែលជាបញ្ហា ហើយ​ដែលធ្វើ​ឲ្យគេឃើញថា លោកពូទីន ហាក់កំពុងតែទ័លច្រកខ្លាំងណាស់ បានជាប្រឹងប្រកាសកាត់ដីតំបន់ទាំងនោះជារបស់រុស្ស៊ីជាផ្លូវការ ទាំងដែលការពិតជាក់ស្តែង កងទ័ពខ្លួនគ្រប់គ្រងតែមួយផ្នែកតែប៉ុណ្ណោះ។ សួរថា តើលោកពូទីន នឹងប្រកាសកាត់យកត្រឹមណា នៃដែនដីតំបន់ទាំង៤នោះ? យកត្រឹមតែអ្វី ដែល​កងទ័ពរុស្ស៊ីកំពុងតែកាន់កាប់ ក្នុងអំឡុងពេលនេះ ? ឬក៏យកទាំងស្រុង? មុនកម្មវិធីប្រកាសជាផ្លូវការបានចាប់ផ្តើម តែ២ម៉ោង  លោក Dmitri Peskov អ្នកនាំពាក្យ​វិមាន​ក្រឹមឡាំង បានបញ្ជាក់ថា រុស្ស៊ីនឹងកាត់យកដែនដីទាំងស្រុងតែម្តង​ នៃតំបន់​លូហ្កង់ស៍ និងតំបន់​ដូណេតស៍ បញ្ចូល​មកក្នុងទឹកដីរុស្ស៊ី។ ដោយឡែក សម្រាប់តំបន់ ហ្សាប៉ូរីចា​ និងតំបន់ ឃឺសិន គឺរដ្ឋាភិបាលរុស្ស៊ី​ មិនទាន់សម្រេចចិត្តច្បាស់ទេ ពោលគឺកំពុងតែពិចារណា គូសវាសព្រំដែឲ្យច្បាស់ ថាកាត់ចូលមកខាងរុស្ស៊ី​ទំហំប៉ុណ្ណា។ បើ​យោងតាម Institute for the Study of War គឺរុស្ស៊ីគ្រប់គ្រងផ្ទៃដីប្រមាណ ៧២% នៃតំបន់ហ្សាប៉ូរីចា ហើយតំបន់ ឃឺសិនវិញ គឺកងទ័ពរុស្ស៊ីកាន់កាប់ចំនួន ៨៨%។ ចំណែក​នៅ​លូហ្កងស៍ និងដូណេតស៍ ក៏មិនមែនកងទ័ពរុស្ស៊ីគ្រប់គ្រងទាំងស្រុងដែរ។​ នៅសមរភូមិ ការប្រយុទ្ធកំពុងក្តៅគគុក​ខ្លាំង​ កងទ័ពអ៊ុយក្រែនកំពុងតែ​សំរុក រំកិលទៅមុខខ្លាំងណាស់ ដើម្បីដណ្ដើមយកទឹករបស់ខ្លួនមកវិញ។ ដូច្នេះព្រំដែន​នេះ វាគ្មានអ្វី​ច្បាស់លាស់ទាល់តែសោះ។ តែយ៉ាងណា​អ្វីដែលគេព្រួយបារម្ភ គឺថាអំណេះតទៅ លោក​ពូទីននឹងយក​លេស ថាអ៊ុយក្រែនព្រមទាំងសម្ព័ន្ធមិត្តលោកខាងលិច វាយ​ប្រហារចូលទឹកដីរបស់រុស្ស៊ី។ មានន័យថា រុស្ស៊ីអាចឆ្លើយតបវិញបាន គ្រប់វិធីទាំងអស់ ដោយរួមទាំងការប្រើអាវុធនុយក្លេអ៊ែរ។ ត្រង់នេះហើយដែលជាស្ថានការណ៍ថ្មី គួរឲ្យ​បារម្ភបំផុត។​ លោកចូ បៃដិន ៖ Never never and never !  នៅក្នុងសារវីដេអូថ្មីចុងក្រោយ របស់​លោក​ប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី លោក​បាន​លើកឡើងថា ចាប់ពីពេលនេះទៅ សង្គមរុស្ស៊ី នឹងត្រូវរស់នៅដោយ​ឯកោ ដោយ​ក្តីលំបាក និង​ដោយ​ភាពគ្មាន​ការគោរពតម្លៃមនុស្ស ដោយសារតែ​ការសម្រេចចិត្តរបស់​មនុស្សតែម្នាក់គត់ ឈ្មោះ ពូទីន។ លោកហ្សេឡេនស្គី បានអំពាវនាវថា អ្វីៗនៅមិនទាន់ហួសពេលទេ សម្រាប់ប្រជាជនរុស្ស៊ី ដែលចង់បញ្ឈប់ស្ថានភាពដ៏អាម៉ាសមួយនេះ។ គឺប្រជាជនរុស្ស៊ីត្រូវតែក្រោកឈរឡើង ចាប់ខ្លួន​ជនម្នាក់នោះ​ ដែលវង្វេង​​ឆ្កួតនឹង​សង្គ្រាម ដោយ​មិនគិតខ្វល់​ដល់ជីវិត​របស់​​ប្រជាជន​រុស្ស៊ី។​ លោក​វ្លូឌីមៀរ ហ្សេឡេនស្គី ក៏បានប្តេជ្ញាផងដែរ ថាអ៊ុយក្រែន នឹងបន្តប្រយុទ្ធ យកឈ្នះ​សង្គ្រាម​នេះឲ្យ​បាន ដើម្បី​ប្រមូលទឹកដីរបស់ខ្លួនមកវិញ។ លោកបាន​ថ្លែងរំពឹងថាសហគមន៍អន្តរជាតិ ជាពិសេសសម្ព័ន្ធមិត្តលោកខាងលិច​ នឹងជួយ​ប្រជាជនអ៊ុយក្រែន ដើម្បីយកឈ្នះសង្គ្រាម​នេះ។ ឆ្លើយតបទៅនឹងសំដី​ស្នើសុំជំនួយបន្ថែមរបស់លោក​ហ្សេឡេនស្គីនេះ​ សភាខុសហ្ក្រេសរបស់​អាមេរិក បានសម្រេច ភ្លាម កាលពីថ្ងៃម្សិលមិញ នូវ​​កញ្ចប់ថវិកា​ថ្មីមួយទៀត ដើម្បីជួយអ៊ុយក្រែន ដែលមានទឹក​ប្រាក់សរុប ចំនួន ១ម៉ឺន២ពាន់លានដុល្លារ។ ក្នុងកញ្ចប់នេះ​ គឺ​មាន ៣ពាន់លានដុល្លារ នឹងយក​ជួយផ្នែកកងទ័ព តាមរយៈការហ្វឹកហាត់ ផ្គត់​ផ្គង់សម្ភារៈ ព្រមទាំងប្រាក់ខែទាហានអ៊ុយក្រែនជាដើម។ ចំណែកលោក​ លោក​ប្រធានាធិបតី​ ចូ បៃដិន វិញ​ បានគូសបញ្ជាក់យ៉ាងច្បាស់ជាថ្មីម្តងទៀត​ កាលពីថ្ងៃព្រហស្បតិ៍​​ម្សិលមិញ​​ថា គ្មានថ្ងៃជាដាច់ខាត ដែល​អាមេរិកនឹងទទួលស្គាល់ ​នូវការទាមទារឬកា​រប្រកាសរបស់រុស្ស៊ី  ដែលថាតំបន់ទាំង៤នោះ គឺជាទឹកដីរបស់​​រុស្ស៊ី​។ ដូចគ្នាដែរ លោកស្រី លីហ្ស ត្រាស្ស នាយករដ្ឋមន្ត្រីអង់គ្លេសវិញ បាន​លើកឡើងថា អង់គ្លេសនឹងមិនទទួលស្គាល់ជាដាច់ខាត ចំពោះការកាត់យកទឹកដីអ៊ុយក្រែន ពីសំណាក់រុស្ស៊ី។ លោកស្រីបន្ថែមថា ពិភពលោកយើង មិនអាចបណ្តោយ​ឲ្យពូទីន ដើរប្លន់ទឹកដី ផ្លាស់ប្តូរបង្ខឹតព្រំដែន បានតាមតែចិត្ត ដោយ​គ្មានគោរពច្បាប់អន្តរជាតិ បែបនេះបានទេ។​ ចំណែកលោក​អគ្គលេខាធិការអង្គការសហប្រជាជាតិវិញ បានចាត់ទុកសកម្មភាពប្លន់ទឹកដី​អ៊ុយក្រែន ពីសំណាក់រុស្ស៊ី​​នេះ ថាជា​ទង្វើដែល​មិនត្រូវឲ្យ​កើតមានទាល់តែសោះ ក្នុងយុគសម័យ​​ទំនើប​បច្ចុប្បន្ននេះ។​ រុស្ស៊ីកាន់តែឯកោលើឆាកអន្តរជាតិ? តាមការគ្រោងទុក នៅល្ងាចថ្ងៃសុក្រនេះ ក្រុមប្រឹក្សាសន្តិសុខនឹងប្រជុំបន្ទាន់ ដើម្បីអនុម័តលើគម្រោងសេចក្តីសម្រេចចិត្តមួយ ស្នើដោយ​អាមេរិក និង​អាល់បានី។ អត្ថបទនេះ មាន​ខ្លឹមសារអំពាវនាវឲ្យ​ប្រទេសទាំងអស់ ត្រូវកុំទទួលស្គាល់ការ​កាត់យកទឹកដីអ៊ុយក្រែនពីសំណាក់រុស្ស៊ី។ អត្ថបទនេះ ក៏បាន​ទាមទារឲ្យ​រុស្ស៊ីត្រូវ​តែ​បញ្ឈប់ជាបន្ទាន់ នូវការធ្វើការសង្គ្រាមឈ្លានពានអ៊ុយក្រែន ហើយត្រូវដកទ័ពចេញជាបន្ទាន់ និងទាំងស្រុង ដោយ​គ្មានលក្ខខណ្ឌ ចេញពីទឹកដីអ៊ុយក្រែន​។ ជាការពិតមែន គ្មាននរណាភ្ញាក់ផ្អើលទេ ថា​រុស្ស៊ីប្រាកដជានឹងប្រើសិទ្ធិវ៉េតូ មិនឲ្យគេអនុម័តសេចក្តីសម្រេចចិត្តនេះ។ តែអ្វីដែលគេកំពុងរងចាំមើល គឺគោលជំហររបស់​ចិន និងរបស់ឥណ្ឌា។ កន្លងមក មហាអំណាចអាស៊ីទាំង២នេះ បានបោះឆ្នោត​អនុបវាទ។ តែថ្មីៗនេះ យើងបានឃើញហើយ​ថា ចិននិងឥណ្ឌា ហាក់បង្ហាញជំហរដកខ្លួនឆ្ងាយ​ពីរុស្ស៊ី បន្តិច។ បើផ្អែកតាមការវិភាគ របស់​លោក Richard Gowan អ្នកវិភាគនៅអង្គការ International Crisis Group គឺថាក្រុមប្រទេសលោកខាងលិច សង្ឃឹមថានឹងអាចប្រកាសថ្កោលទោសរុស្ស៊ី ក្នុងក្របខណ្ឌអង្គសន្និបាទនៃអង្គការសហប្រជាជាតិវិញ ព្រោះគ្មានប្រទេសណាមានសិទ្ធិវ៉េតូទេ។ តាមការវិភាគ ប្រទេសកាន់តែច្រើនជាពិសេស​នៅអាហ្វ្រិក គឺបាននាំគ្នាដកខ្លួនឆ្ងាយ លែងចាញ់សំពាធរបស់រុស្ស៊ីទៀតហើយ។ មានន័យថា រុស្ស៊ីនឹងកាន់តែឯកោម្នាក់ឯង បន្ទាប់ពី​ប្រទេស​សឹងតែ​ទាំងអស់ប្រកាសថ្កោលទោស លើកលែងតែ៤ប្រទេសទេ ដែលនៅតែស្មោះនឹងរុស្ស៊ី គឺ បេឡារុស ស៊ីរី កូរ៉េខាងជើង និង​អេរីត្រេ៕
    9/30/2022
    8:53
  • តើហ្វេសប៊ុក​ដើរ​តួ​បំផុស​អំពើ​ហិង្សា​និ​ងការ​ស្អប់​ខ្ពើម​ជនជាតិ​រ៉ូហ៊ីងយ៉ា យ៉ាងណា ?
    បើ​តាម​របាយការណ៍​របស់​អង្គការ Amnesty International ចេញ​ផ្សាយ​នៅ​ថ្ងៃព្រហស្បតិ៍​ទី ២៩ កញ្ញា ២០២២ ហ្វេសប៊ុក​មានចំណែក​ទទួលខុស​ត្រូវ​ លើ​ការ​ផ្សព្វផ្សាយព័ត៌មាន​បំផុស​ឲ្យ​ស្អប់​ជនជាតិ​រ៉ូហ៊ីងយ៉ា រហូត​មាន​អំពើ​កាប់​សម្លាប់​ជនជាតិ​ភាគ​តិច​កាន់សាសនា​អ៊ីស្លាម​នៅភូមា អស់​ជា​ច្រើន​នាក់​ កាលពី​ឆ្នាំ​២០១៧។ នៅក្នុង​របាយការណ៍​ដ៏​គួរ​ឱ្យ​រន្ធត់ អង្គការ​ក្រៅ​រដ្ឋាភិបាល​អង់គ្លេសបាន​រៀប​រាប់​ថា​បណ្តាញ​សង្គម​ហ្វេសប៊ុក​ មិន​ខ្វល់​សោះ​នឹង​បញ្ហា​សិទ្ធិមនុស្ស។ ដូច្នេះ​ក្រុមហ៊ុន​មេតា ត្រូវ​តែ​សង​ជំងឺ​ចិត្ត​ដល់​ជន​រងគ្រោះ​ ក្នុង​​អំពើ​ហិង្សា​រើសអើងជនជាតិ​ភាគតិច​ ដែលបន្ត​ជ្រកក្រោន​ ​ក្នុង​ចំនួន​ដ៏​ច្រើន​ នៅជំរំ​ជនភៀស​ខ្លួន​ប្រទេស​បង់ក្លាដែស។ កាលពី​ឆ្នាំ​២០១៧ ជនជាតិ​រ៉ូហ៊ីងយ៉ា​នៅភូមា បាន​រង​អំពើ​ហិង្សា​កាប់​សម្លាប់ ចាប់​រំលោភ​បំពាន​ ដុត​ផ្ទះ​សម្បែង ពី​សំណាក់​ក្រុមយោធា​ភូមា​​ ដែល​​ជំរុញ​ឱ្យ​ជនជាតិភាគ​តិច​កាន់​សាសនា​អ៊ីស្លាម​ ជា​ច្រើន​ម៉ឺន​​នាក់​នាំ​គ្នា​រត់​ភៀស​ខ្លួន​ចេញ​ទឹក​ដី​កំណើត​ភូមា ហើយ​បច្ចុប្បន្ន​កំពុង​បន្ត​ជ្រក​កោន​ក្នុង​ជំរំ​នៅ​ប្រទេស​បង់ក្លាដែស​ជិត​ខាង ប្រមាណ​៨សែន៥ម៉ឺននាក់។​ ​​បើ​តាម​ការ​ស្រាវជ្រាវ​របស់​អង្គការ​ Amnesty International ហ្វេសប៊ុក​មានតួនាទី​ស្នូល ក្នុង​ការ​ជំរុញ​ឱ្យ​មាន​ការ​រើងអើងនិង​ស្អប់​ខ្ពើម​ជនជាតិ​ភាគ​តិច​កាន់​សាសនា​អ៊ីស្លាម​រ៉ូហ៊ីងយ៉ានេះ និង​តាំងពី​ឆ្នាំ​២០១២​មក​។ នៅភូមា​ បណ្តាញ​សង្គម​គឺ​ជា​សេវា​អ៊ីនធ័រនែត​តែមួយ​គត់​ដែល​គេ​អាច​ប្រើ​បាន​ដោយ​សេរី។ តាម​រយៈ​ហ្វេសប៊ុក រាល់​គ្រប់​សារ​ហិង្សា​ សារ​បែប​ស្អប់​ខ្ពើម​គ្នា បាន​​រីក​សាយភាយ យ៉ាង​លឿន​ និ​ងកាន់​តែធំ។ អ្នក​ខ្លះ​ បញ្ចេញ​គំនិត​ស្អប់​និង​ខឹង​ខ្លាំង​រហូត​​ចង់​​សម្លាប់​ជនជាតិ​រ៉ូហ៊ីងយ៉ា ​​លើ​ទំព័រ​ហ្វេសប៊ុក​ ដោយ​ចំៗ ដែលចូល​រួម​ចំណែក​ពន្យុះ​​​ក្រុមយោធា​ដែល​ក៏​មាន​ចិត្ត​ហិង្សា​ស្រាប់​ ចេញ​ធ្វើ​ប្រតិបត្តិការ​បោស​សម្អាត​ជាតិ​ពិន្ធុ​នេះ។ ​តើ​ហ្វេសប៊ុក​រួម​ចំណែក​​ផ្សព្វផ្សាយ​បំផុស​ព័ត៌មាន​នាំ​ឱ្យ​មាន​​ការ​ស្អប់​ខ្ពើ​មជន​ជាតិ​ភាគ​តិច​រ៉ូហ៊ីងយ៉ា  យ៉ាង​ដូចម្តេចទៅ ? គឺដោយសារប្រព័ន្ធ​​អាល់ហ្គោរីត​របស់​ហ្វេសប៊ុក​ផ្ទាល់​តែ​ម្តង។ ​ហ្វេសប៊ុក​ ផ្តល់អាទិភាព​​ឱ្យសារ ដែល​មាន​អ្នក​ខំមិន​ច្រើន ​ឱ្យ​លោត​​អណ្តែត ចេញលើ​​គេ​ (បើក​ទៅ​ឃើញៗ) ដោយ​មិន​គិត​អំពី​ខ្លឹមសារ​ឡើយ។ ដូច្នេះ​នៅពេល​សារ​បែប​ហិង្សា​និង​ស្អប់​ខ្ពើម​គ្នា ​ដែល​​តែងតែ​ មាន​ការ​បញ្ចេញ​យោបល់ឆ្លើយ​ឆ្លង​គ្នា​ច្រើន ទោះ​វិជ្ជមានក្តី​​អវិជ្ជមានក្តី វា​នឹង​អណ្តែត​មើល​ឃើញ​មុន​គេ។ មាន​ន័យ​ថា ហ្វេសប៊ុក​បាន​ផ្តល់​វេទិកា​ ផ្តល់​ឱកាស​ គ្មាន​ប្រៀប​ឱ្យ​ភូមា​ផ្សព្វផ្សាយ​អំពើ​ហិង្សា​និង​ការ​ស្អប់​ខ្ពើម​ជនជាតិ​ភាគ​តិច​រ៉ូហ៊ីងយ៉ា រស់​នៅក្នុង​ប្រទេស​ដែល​ប្រជាពលរដ្ឋ​ភាគ​ច្រើន​ជា​អ្នក​កាន់​ព្រះពុទ្ធសាសនា។ ក្បួន​អាល់ហ្កោរីត​របស់​ហ្វេសប៊ុក​នេះ ចោទ​ជា​បញ្ហា​នៅក្នុង​គ្រប់ប្រទេស​លើ​ពិភពលោក មិនមែន​តែ​នៅ​ភូមា​មួយ​ទេ។ ​ហ្វេសប៊ុកគិតផល​ចំណេញជាង​គិត​រឿង​សិទ្ធិមនុស្ស ? ក្រុមហ៊ុន​ បាន​ដឹង និង ត្រូវ​តែ​​ដឹង​ថា ប្រព័ន្ធ​អាល់ហ្គោរីត​របស់​ហ្វេសប៊ុក អាច​នឹង​បំផុស​ ពង្រីក​សារ​ស្អប់​រ៉ូហ៊ីងយ៉ា​ឱ្យ​សាយភាយ​កាន់​តែ​កាន់​ខ្លាំង​នៅ ភូមា។ ក្រុមហ៊ុន​បាន​ទទួល​សារដាស់​តឿន​និង​ព្រមាន​ជា​ច្រើន​ដែរ។ ​កាលពី​ឆ្នាំ​២០១៤ ក្រោយផ្ទុះ​អំពើ​ហិង្សា​ខ្លាំង​បី​បួន​ថ្ងៃជាប់​គ្នា និង​តាម​រយៈ​សំណើ​របស់​រដ្ឋាភិបាលភូមា ហ្វេសប៊ុកបាន​បញ្ចេញ​សកម្មភាព​ប្រកប​ដោយ​ប្រសិទ្ធភាព​​ម្តងប្រឆាំង​នឹង​សារ​ញុះញង់។ ​ប៉ុន្តែ ដោយ​​អន់​ចំណូល​ និងដើម្បី​ផលប្រយោជន៍​សេដ្ឋកិច្ច​ជាអាទិភាព​ ​ក្រុមហ៊ុនលែង​​ខ្វល់​នឹង​បញ្ចេញ​សកម្មភាពដើម្បី​សិទ្ធិមនុស្ស​។ ​មេតា ត្រូវ​ការ​និង​ចង់​ឱ្យ​តែ​អ្នក​ប្រើប្រាស់​ហ្វេសប៊ុក​ស្រីប្រុស​ទាំងអស់ បន្តចូល​លេង​​និង​មើល​តាមដាន​ក្នុ​ងបណ្តាញ​សង្គម​របស់​ខ្លួន​ឱ្យ​បាន​យូរបំផុត​ កាន់​តែយូរកាលណា កាន់​តែ​ល្អកាលណុង ព្រោះ​ក្រុមហ៊ុន​នឹង​អាច​លក់​កម្មវិធី​ផ្សាយ​ពាណិជ្ជកម្ម​បាន​ចំណូល​ច្រើន​។ ក្នុង​ពេល​ដែល​យោធា​ភូមា​កំពុង​ប្រព្រឹត្ត​អំពើ​ បែប​ឧក្រិដ្ឋ​ប្រឆាំង​នឹង​មនុស្ស​ជាតិ លើ​ជនជាតិ​រ៉ូហ៊ីងយ៉ា ក្រុមហ៊ុន​មេតា ប្រមូលបាន​​ប្រាក់​ចំណេញ​ ​ច្រើន​ណាស់ក្នុង​អំឡុងពេល​នោះ តាម​រយៈ​សន្ទុះកប់​ពពក​នៃ​សារ​ស្អប់​ខ្ពើម​គ្នាតាម​បណ្តាញ​ហ្វេសប៊ុក។​ ក្រុមហ៊ុន​ឡើង​មាន​បាន​ខ្លាំង​ តែ​ក្នុង​រយៈ​ពេល​ប៉ុន្មាន​ឆ្នាំ។ ហេតុ​ដូច្នេះ​ហើយ​បាន​ជា​អង្គការ​ Amnesty International យល់​ថា ក្រុមហ៊ុន​មេតា​ត្រូវ​ដឹង​ខ្លួន និង​សង​ជំងឺ​ចិត្ត​ដល់​រង​គ្រោះ ចំពោះ​ទង្វើ​គ្មាន​ទំនួល​ខុស​ត្រូវ​របស់​ខ្លួន។​ ​ជន​រងគ្រោះរ៉ូហ៊ីងយ៉ា​ ​នឹង​ទទួល​បាន​សំណង​យ៉ាង​ណា​ពី​ហ្វេសប៊ុក ? សំណង​ជា​លុយ​កាក់​ ​ទំនង​អាច​បន្ធូរបន្ថយ​ស្ថានការណ៍​បាន​ខ្លះ ព្រោះ​ជនរ៉ូហ៊ីងយ៉ានៅក្នុង​ជំរំ​ប្រទេស​បង់ក្លាដែស ត្រដរ​រស់​ក្នុង​ស្ថានភាព​យ៉ាប់យឺន​មែនទែន មិន​ទាំង​អាច​ផ្តល់​ការ​សិក្សា​ដល់​ក្មេងៗផង។ ប៉ុន្តែ​ ជនភៀសខ្លួន​រ៉ូហ៊ីងយ៉ា​ភាគច្រើន ចង់​បាន​ដំណោះស្រាយយូរអង្វែង​ច្រើន​ជាង​ ពោល​គឺ​មិន​ឱ្យ​ហេតុការណ៍​ហិង្សាដែល​ខ្លួន​ធ្លាប់​ឆ្លងកាត់​  កើត​មាន​ឡើង​ទៀត។ ពេល​នេះ​ក្រុមជនជាតិ​ភាគតិច​រ៉ូហ៊ីងយ៉ា ជា​ច្រើន​ក្រុម​​កំពុង​ដាក់ពាក្យ​បណ្តឹង​​បី​ នៅ​តុលាការប្រទេស​អង់គ្លេស និង​សហរដ្ឋ​អាមេរិក។ ដូច្នេះ​ទំនួល​ខុស​ត្រូវ​របស់​ហ្វេសប៊ុក​នឹង​ត្រូវ​សង​តាម​ផ្លូវ​ច្បាប់​ដោយ​ប្រាកដ។ អង្គការ​យុវជន​ភៀសខ្លួន​រ៉ូហ៊ីងយ៉ា បាន​ដាក់​បណ្តឹង​ប្រឆាំង​នឹង​មេតា​ដែរ​នៅ​អង្គការ​កិច្ចសហប្រតិបត្តិការ​និង​អភិវឌ្ឍ​សេដ្ឋកិច្ច។ សម្រាប់​ Amnesty International មេតា​ចាំបាច់​ត្រូវ​ធ្វើ​កំណែទម្រង់​​ប្រព័ន្ធ​អាល់ហ្គោរីត​របស់​ខ្លួន បើ​ពុំ​នោះ​ទេ​នឹង​មាន​សោកនាដកម្ម​ថ្មី​ដោយ​សារ​ស្នាដៃ​មេតា​ ដូច​ករណី​រ៉ូហ៊ីងយ៉ា នៅ​តាម​បណ្តា​ប្រទេស​ផ្សេង​ទៀត ដែល​មាន​ជម្លោះ​ជាតិ​ពិន្ធុ​ជាក់​ជា​ពុំ​ខាន៕
    9/29/2022
    6:13
  • ធ្លាយបំពង់បង្ហូរឧស្ម័ន Nord Stream៖ហេតុអ្វីបានជាមានការលើកឡើងពីវិច្ឆេទកម្មជាងគ្រោះថ្នាក់?
    សង្រ្គាមពាក្យសម្តី​កំពុង​បន្ត​មាន​យ៉ាង​ផុសផុល​ជុំវិញ​ការ​បែកធ្លាយ​បំពង់​បង្ហូរ​ឧស្ម័ន Nord Stream 1 និង Nord Stream 2 នៅ​ក្រោម​សមុទ្រ​បាល់ទិក​កាល​ពី​ថ្ងៃ​ចន្ទ ទី២៧ កញ្ញា។ បំពង់​បង្ហូរ​ឧស្ម័ន​ទាំង​ពីរ​នេះ​បាន ត ភ្ជាប់​ពី​ប្រទេស​រុស្ស៊ី​ទៅ​ប្រទេស​អាល្លឺម៉ង់។ ការ​បែក​ធ្លាយ​មាន ៣កន្លែង​ផ្សេង​គ្នា​ដោយ​មាន​ពីរ​កន្លែង​នៅ​លើ​បំពង់ Nord stream 1 ក្នុង​នោះ មាន​មួយ​កន្លែង​ស្ថិត​ក្នុង​ដែន​ទឹក​របស់​ដាណឺម៉ាក និង​មួយ​កន្លែង​ទៀត​ស្ថិត​ក្នុង​ដែន​ទឹក​របស់​ស៊ុយអែត។ ចំណែក​ការ​ធ្លាយ​មួយ​កន្លែង​លើ​បំពង់ Nord Stream 2 ស្ថិត​ក្នុង​ដែន​ទឹក​សេដ្ឋកិច្ច​ផ្តាច់មុខ​របស់​ដាណឺម៉ាក។ ខណៈ​នេះ ការ​ស៊ើបអង្កេត​មួយ​បាន​បើក​ធ្វើ​ដើម្បី​ស្វែង​រក​ការ​ពិត​ជុំវិញ​ការ​បែក​ធ្លាយ​បំពង់ Nord Stream ទាំង​ពីរ។ នៅ​ក្នុង​សម្មតិកម្ម​ពី​ដំបូង ពោល​នៅ​ក្រោយ​កើត​ហេតុ​ភ្លាមៗ គេ​បាន​ទុក​ការ​បែក​ធ្លាយ​បំពង់​បង្ហូរ​ឧស្ម័ន Nord Stream នៅ​ក្រោម​សមុទ្រ​បាល់ទិក​ដែល​ត ភ្ជាប់​ពី​រុស្ស៊ី​ទៅ​អាល្លឺម៉ង់​ជា​រឿង​គ្រោះថ្នាក់ មាន​ន័យ​ថា មិនមែន​ជា​ទង្វើ​របស់​អ្នក​ណា​ម្នាក់ ឬ​ប្រទេស​ណា​មួយ​ទេ។ តែ​ក្រោយ​មក សម្មតិកម្ម​គ្រោះថ្នាក់​នេះ​ហាក់​ត្រូវ​បាន​គេ​ផាត់​ចេញ​បន្តិច​ម្តងៗ​ដោយ​ងាក​ទៅ​ផ្តោត​លើ​សម្មតិកម្ម​វិច្ឆេទកម្ម​វិញ មាន​ន័យ​ថា ជា​ទង្វើ​បង្ក​ឡើង​ដោយ​អ្នក​ណា​ម្នាក់ ឬ​ប្រទេស​ណា​មួយ​វិញ។ ទង្វើ​វិច្ឆេទកម្ម​អាច​ជា​ទង្វើ​ដោយ​ចេតនា មិន​ចេតនា ឬ​ជា​ទង្វើ​ដែល​មាន​ការ​រៀបចំ​ទុក​មុន។ ហេតុផល​ដែល​គេ​ហ៊ាន​លើក​ឡើង​ថា​ជា​វិច្ឆេទកម្ម គឺ​ដោយសារ​មាន​សំឡេង​ផ្ទុះ​ចំនួន​ពីរ​ដង​នៅ​ក្រោម​សមុទ្រ មុន​មាន​ការ​ធ្លាយ​ឧស្ម័ន​អណ្តែត​លើ​ផ្ទៃសមុទ្រ​ដែល​គេ​បាន​ឃើញ​ផ្ទាល់​នឹង​ភ្នែក។ សំឡេង​ផ្ទុះ​ចំនួន​ពីរ​ដង​នេះ​ត្រូវ​បាន​ថត​ដោយ​មជ្ឈមណ្ឌលជាតិ​រញ្ជួយ​ដី​របស់​ប្រទេស​ស៊ុយអែត ក្នុង​នោះ កម្លាំង​ផ្ទុះ​ទី១ មាន​កម្រិត ១,៩រ៉ិចទ័រ ហើយ​កម្លាំង​ផ្ទុះ​ទី២ មាន​កម្រិត ២,៣រ៉ិចទ័រ។ សំឡេង​ផ្ទុះ​ទាំង​ពីរ​នេះ​ក៏​ត្រូវ​បាន​បញ្ជាក់​ដោយ​វិទ្យាស្ថាន​ឯករាជ្យ​មួយ​នៅ​ក្នុង​ប្រទេស​ដាណឺម៉ាក​ដែរ។ យោង​តាម​ក្រុម​អ្នក​ជំនាញ​រញ្ជួយដី កម្លាំង​ផ្ទុះ​មាន​ឥទ្ធិពល​ស្មើ​នឹង​ការ​បំផ្ទុះ​ជាតិ TNT ដល់​ទៅ ១០០តោន។ សម្រាប់​អ្នក​ជំនាញ​ស៊ុយអែត​លោក Peter Schmidt ការ​ផ្ទុះ​ដោយ​កម្លាំង​ខ្លាំង​ដូច​កម្លាំង​រញ្ជួយ​ដី​ទាំង​ពីរ​នេះ​បាន​ធ្វើ​ឲ្យ​បែក​ធ្លាយ​បំពង់​បង្ហូរ​ឧស្ម័ន Nord Stream ដល់​ទៅ ៣កន្លែង​ក្នុង​ពេល​តែ​មួយ។ តើ​ជា​ស្នាដៃ​របស់​អ្នក​ណា? នៅ​ពេល​នេះ គេ​ពិបាក​ទម្លាក់​ការ​ទទួល​ខុស​ត្រូវ​លើ​អ្នក​ណា​ម្នាក់ ឬ​ប្រទេស​ណា​មួយ នោះ​បើ​ទោះ​បី​ជា​រុស្ស៊ី​កំពុង​ត្រូវ​បាន​គេ​ចង្អុល​មុខ​ក៏​ដោយ។ អ្វី​ដែល​ច្បាស់ សហភាពអឺរ៉ុប​បាន​លើក​ឡើង​ចំៗ​ថា​ជា​វិច្ឆេទកម្ម ពោល​មិនមែន​ជា​គ្រោះថ្នាក់​ទេ។ នៅ​ក្នុង​សេចក្តីថ្លែងការណ៍​ចុះ​ផ្សាយ​ក្នុង​ថ្ងៃ​ពុធ ទី២៨ កញ្ញា ប្រមុខ​ការទូត​អឺរ៉ុប​លោក Josep Borrell បាន​ព្រមាន​ប្រឆាំង​នឹង​គ្រប់​ការ​វាយប្រហារ​សំដៅ​លើ​ហេដ្ឋារចនាសម្ព័ន្ធ​ថាមពល​អឺរ៉ុប។ តាម​លោក Josep Borrell រាល់​ទង្វើ​ចេតនា​ដែល​ប៉ះពាល់​ដល់​ហេដ្ឋារចនាសម្ព័ន្ធ​ថាមពល​អឺរ៉ុប​ជា​រឿង​មិន​អាច​ទទួល​យក​បាន និង​ត្រូវ​ទទួល​ការ​ឆ្លើយ​តប​វិញ​យ៉ាង​ម៉ឹងម៉ាត់​ជា​ទីបំផុត។ គួរ​បញ្ជាក់​ថា ព្រឹត្តិការណ៍​បែក​ធ្លាយ​បំពង់បង្ហូរ​ឧស្ម័ន Nord Stream ពេល​នេះ​បាន​កើត​មាន​ឡើង ចំ​ពេល​ដែល​សង្រ្គាម​រុស្ស៊ី​ឈ្លានពាន​អ៊ុយក្រែន​កំពុង​បន្ត​ក្តៅ​គគុក និង​ខណៈ​ដែល​បស្ចិមលោក​កំពុង​បន្ត​សង្កត់ ក​រុស្ស៊ី​ដោយ​ប្រើ​ទណ្ឌកម្ម​សេដ្ឋកិច្ច និង​ការ​ជួយ​គាំទ្រ​អ៊ុយក្រែន​ជា​លុយកាក់ និង​ជា​គ្រឿងសព្វាវុធ។ ពី​ខាង​រុស្ស៊ី​វិញ ក្រុង​មូស្គូ​បាន​ប្រើ​ឧស្ម័ន​ដែល​អឺរ៉ុប​បាន​ពឹង​ខ្លាំង​លើ​ខ្លួន​ជា​អាវុធ​យុទ្ធសាស្រ្ត​ដើម្បី​សងសឹក​វិញ។ អ៊ីចឹង​ហើយ​បាន​ជា​មាន​ការ​លើក​ឡើង​ថា មាន​តួអង្គ​សំខាន់​ចំនួន ៤ ដែល​អាច​ជាប់​ពាក់ព័ន្ធ​នឹង​រឿង​វិច្ឆេទកម្ម​ទម្លាយ​បំពង់បង្ហូរ​ឧស្ម័ន Nord Stream គឺ​អឺរ៉ុប អាមេរិក រុស្ស៊ី និង​អ៊ុយក្រែន។ តើ​ជា​ស្នាដៃ​របស់​អឺរ៉ុប​ខ្លួន​ឯង?។ ចម្លើយ គឺ​ប្រហែល​មិន​អាច​ទេ ព្រោះ​អឺរ៉ុប​កំពុង​ត្រូវ​ការ​ឧស្ម័ន។ តើ​ជា​ស្នាដៃ​របស់​អាមេរិក?។ វា​អាច តែ​ប្រហែល​អាមេរិក​មិន​ធ្វើ​ទេ ព្រោះ​មាន​ផលវិបាក​ច្រើន​ជាង​ផល​ចំណេញ។ បើ​ជា​ស្នាដៃ​រៀបចំ​ដោយ​អាមេរិក​មែន អាមេរិក​នឹង​បាត់បង់​កិត្តិយស បែកបាក់​ជាមួយ​អឺរ៉ុប និង​ជាមួយ​អង្គការ​អូតង់។ តើ​ជា​ស្នាដៃ​របស់​អ៊ុយក្រែន?។ រឿង​អី​ថា​មិន​បាន ព្រោះ​អ៊ុយក្រែន​កំពុង​ចង់​ឲ្យ​អឺរ៉ុប​ឈប់​ទិញ​ឧស្ម័ន​ទាំង​ស្រុង​ពី​រុស្ស៊ី​ស្រាប់​ផង។ តែ​បញ្ហា​នៅ​ត្រង់​ថា អ៊ុយក្រែន​គ្មាន​សមត្ថភាព​ទៅ​កម្ទេច​បំពង់ Nord stream ដល់​បាត​សមុទ្រ​ទេ។ ដូច្នេះ​នៅ​សល់​តួអង្គ​រុស្ស៊ី​ដែល​មាន​ទាំង​សមត្ថភាព និង​លទ្ធភាព​ក្នុង​ការ​ធ្វើ​រឿង​នេះ។ តែ​សំណួរ​ដែល​ចោទ បើ​រុស្ស៊ី​ចង់​ឈប់​បញ្ជូន​ឧស្ម័ន​ទៅ​អឺរ៉ុប​ទាំង​ស្រុង រុស្ស៊ី​អាច​បិទ​រ៉ូប៊ីណេ​បាន​ទេ​តើ ចាំ​បាច់​អី​ទៅ​ទម្លាយ​បំពង់ Nord stream ដែល​ខ្លួន​កំពុង​មាន​ភាគហ៊ុន​ច្រើន​នោះ?។ ទាំង​នេះ​គ្រាន់​ជា​សម្មតិកម្ម ហើយ​អ្វី​ដែល​កំពុង​កើត​មាន​ពេល​នេះ គឺ​ការ​មាន​មន្ទិលសង្ស័យ និង​ការ​ចោទ​គ្នា​ទៅ​វិញ ទៅ​មក។ ដាណឺម៉ាក និង​ន័រវែស​ប្រកាស​ដាក់​ហេដ្ឋារចនាសម្ព័ន្ធ​ថាមពល​ក្នុង​ភាព​​អាសន្ន ក្រោយ​ការ​ផ្ទុះ​ធ្លាយ​បំពង់​បង្ហូរ​ឧស្ម័ន Nord Stream ប្រទេស​ដាណឺម៉ាក និង​ន័រវែស​បាន​ប្រកាស​ដាក់​ហេដ្ឋារចនាសម្ព័ន្ធ​ថាមពល​របស់​ខ្លួន​ក្នុង​ភាព​​អាសន្ន។ ការ​ធ្វើ​ចរាចរណ៍​សមុទ្រ​នៅ​ក្បែរ​តំបន់​ធ្លាយ​ឧស្ម័ន​ត្រូវ​បាន​ហាម​ឃាត់។ រដ្ឋមន្រ្តី​ក្រសួង​ថាមពល​បាន​ប្រកាស​ពង្រឹង​វិធានការ​សន្តិសុខ​នៅ​តាម​ស្ថានីយ៍ប្រេង និង​ឧស្ម័ន​នៅ​គ្រប់​ទីកន្លែង​ទាំង​អស់។ នេះ​ជា​វិធានការ​បង្ការ​ដើម្បី​ទប់ស្កាត់​នឹង​ការ​វាយប្រហារ​ជា​យថាហេតុ​ណា​មួយ​ដូច​ករណី​បំពង់បង្ហូរ​ឧស្ម័ន Nord Stream។ ចូរ​កុំ​ភ្លេច​ថា​ក្រៅ​ពី​រុស្ស៊ី ន័រវែស និង​ដាណឺម៉ាក​ក៏​ជា​ប្រទេស​ផ្គត់ផ្គង់​ឧស្ម័ន​ឲ្យ​អឺរ៉ុប​ដែរ ពិសេស​ន័រវែស។ ក្នុង​ថ្ងៃ​ទទួល​ព័ត៌មាន​ពី​ការ​បែក​ធ្លាយ​បំពង់ Nord stream ប្រទេស​ន័រវែស​បាន​បើក​សម្ពោធ​បំពង់​បង្ហូរ​ឧស្ម័ន​ទៅ​កាន់​ប្រទេស​ប៉ូឡូញ។ ខណៈ​នេះ និង​អត់​ពី​រុស្ស៊ី ន័រវែស​ក្លាយ​ជា​ប្រទេស​ផ្គត់ផ្គង់​ឧស្ម័ន​ច្រើន​ជាង​គេ​ឲ្យ​អឺរ៉ុប។ ប្រឈម​នឹង​ការ​បែក​ធ្លាយ​បំពង់​បង្ហូរ​ឧស្ម័ន Nord stream ពេល​នេះ អឺរ៉ុប​កំពុង​ស្ថិត​ក្នុង​ស្ថានភាព​អាសន្ន​ឧស្ម័ន​ជាង​ពេល​ណាៗ​ទាំង​អស់ ពិសេស​ខណៈ​ដែល​រដូវ​ត្រជាក់​កំពុង​ឈាន​មក​ដល់។ ទន្ទឹម​នឹង​ខ្វះ​ឧស្ម័ន​ប្រើប្រាស់ តម្លៃ​ឧស្ម័ន​បាន​ហក់​ឡើង​មួយ​កម្រិត​ទៀត។ អាល្លឺម៉ង់​ជា​ប្រទេស​ដែល​កំពុង​ប្រឈម​ខ្លាំង​ជាង​គេ ព្រោះ​ពេល​នេះ អាល្លឺម៉ង់​ដែល​ធ្លាប់​ពឹង​លើ​ឧស្ម័ន​រុស្ស៊ី​ដល់​ទៅ ៥៥% លែង​មាន​ឧស្ម័ន​រុស្ស៊ី​ប្រើ​ទៀត​ឡើយ៕
    9/28/2022
    7:18
  • ជប៉ុន​ប្រារព្ធ​ពិធីបុណ្យសព​ដ៏ចម្រូងចម្រាស​របស់​អតីតនាយករដ្ឋមន្រ្តី ស្ហ៊ីនហ្សូ អាបេ
    នៅប្រទេស​ជប៉ុន ពិធីបុណ្យសព​អតីតនាយករដ្ឋមន្រ្តី លោក​ស្ហ៊ីនហ្សូ អាបេ​បាន​ប្រព្រឹត្ត​ទៅ នៅព្រឹកថ្ងៃអង្គារ​ទី ២៧ កញ្ញា ២០២២ ដោយមានការចូលរួម​ពីថ្នាក់ដឹកនាំ​នៅក្នុង​ពិភពលោក​ជាច្រើនរូប ដែលនៅក្នុងនោះ មានផងដែរ លោកនាយករដ្ឋមន្រ្តីហ៊ុន សែន។ លោក​ស៊្ហីនហ្សូ អាបេ ត្រូវ​បាន​ខ្មាន់កាំភ្លើង​បាញ់ សម្លាប់ នៅទីក្រុង ណារ៉ា កាលពីថ្ងៃទី ៨ កក្កដា នៅពេល​លោក​កំពុង​ថ្លែង នៅក្នុង​យុទ្ធនាការ​ឃោសនាបោះឆ្នោត​ព្រឹទ្ធសភា។ ពិធីបុណ្យសពថ្នាក់ជាតិ របស់​លោក​ស្ហ៊ីនហ្សូ អាបេ​មិនត្រឹមទាក់ទាញ អ្នកមានសមានចិត្ត គោរពស្រឡាញ់​លោកអាបេ ប៉ុន្តែ វា​បានទាក់ទាញ​ផងដែរ បាតុកម្ម​ប្រឆាំង នៅប្រទេស​ជប៉ុន។ នៅថ្ងៃអង្គារទី ២៧​កញ្ញា ​ជប៉ុន​បានរៀបចំ ពិធីបុណ្យសព​ថ្នាក់ជាតិ ឲ្យ​លោក​ស្ហ៊ីនហ្សូ អាបេ អតីតនាយករដ្ឋមន្រ្តី ជប៉ុន ដែលត្រូវ​បានខ្មាន់កាំភ្លើង​បាញ់សម្លាប់​ក្នុង​ថ្លុកឈាម នៅក្នុង​យុទ្ធនាការ​ឃោសនាបោះឆ្នោត កាលពី​ថ្ងៃទី ៨ ខែ​កក្កដា កន្លងទៅ។ នៅក្នុង​ពិធីបុណ្យសព​ថ្នាក់ជាតិ​របស់​លោក​ស្ហ៊ីនហ្សូ អាបេ​នៅថ្ងៃនេះ មាន​មនុស្ស​ប្រមាណ ៤៣០០នាក់ ចូលរួម ដែលនៅ​ក្នុងនោះ មាន​ជាង ៧០០នាក់ ជា​មេដឹកនាំ និង​អ្នកតំណាង​រដ្ឋាភិបាល​បរទេស។ នៅក្នុង​ពិធីបុណ្យ​សព​លោក​ស្ហ៊ីនហ្សូ អាបេ ដែល​ត្រូវ​បាន​រៀបចំឡើង នៅ មជ្ឈមណ្ឌល​កីឡា​ Budokan នៅទីក្រុង​តូក្យូ គេឃើញ​មាន​វត្តមាន​របស់​នាយករដ្ឋមន្រ្តី​អូស្ត្រាលី នាយករដ្ឋមន្រ្តី​ឥណ្ឌា លោក​ណារិនដ្រា ម៉ូឌី អនុប្រធានាធិបតី អាមេរិក លោកស្រី ខាម៉ាឡា ហារីស នាយករដ្ឋមន្រ្តី សិង្ហបុរី នាយករដ្ឋមន្រ្តី កម្ពុជា លោកហ៊ុន សែន នាយករដ្ឋមន្រ្តី ម៉ាឡេស៊ី ប្រធានក្រុមប្រឹក្សា​អឺរ៉ុប និង​ស្តេច​ហ្សកដានីជាដើម។ មេដឹកនាំ​បរទេស​ដែលមក​ចូលរួម​ក្នុងពិធីបុណ្យសព​របស់​លោកអាបេ ភាគច្រើន​ជាអ្នកដែលធ្លាប់​មាន​ទំនាក់ទំនង​ល្អ​ជាមួយ​លោក​អាបេ កាលលោកនៅជានាយករដ្ឋមន្រ្តីដឹកនាំរដ្ឋាភិបាល​ជប៉ុន។ ជាក់ស្តែង លោក​ណារិនដ្រា ម៉ូឌី នាយករដ្ឋមន្រ្តី ឥណ្ឌា មិនបាន​បង្ហាញខ្លួន នៅក្នុង​ព្រះរាជពិធីបុណ្យសព​របស់​មហាក្សត្រិយ​អេលីហ្សាបិតទី ២ ប៉ុន្តែ មានវត្តមានផ្ទាល់​នៅក្នុងបុណ្យសព​របស់​លោកអាបេ។ លោកម៉ូឌី​ផ្ទាល់ ធ្លាប់​បាន​ប្រកាស​កាន់ទុក្ខជាតិ​ មួយថ្ងៃ នៅឥណ្ឌា នៅពេល​លោក​ស្ហ៊ីនហ្សូ អាបេ​ត្រូវ​ខ្មាន់កាំភ្លើង​បាញ់​សម្លាប់។ លោក​ម៉ូឌី នៅក្នុង​ពិធីបុណ្យ​សពថ្នាក់ជាតិ របស់​លោក​អាបេ នៅព្រឹកថ្ងៃអង្គារ គេ​មិនឃើញ ព្រះវត្តមាន​ចូលរួម​របស់​ព្រះចៅ​អធិរាជ​ជប៉ុន ណារុហ៊ីតុ ទេ ដោយហេតុ អព្យាក្រឹត្យ​របស់ព្រះអង្គ ប៉ុន្តែ ព្រះរាជបុត្រ​ស្នងរាជ្យ និង​គ្រួសារ​រាជវង្សជាអ្នកចូលរួមទៅវិញ។ បន្ទាប់មក មាន​លោក​នាយករដ្ឋមន្រ្តី ហ្វូមីអូ គីស៊ីដា បាន​អម​ដោយ​អតីត​នាយករដ្ឋមន្រ្តី ជប៉ុនមុនៗ ជាច្រើនរូប។ ពិធីបុណ្យ​សព​ថ្នាក់ជាតិ​របស់​លោកស្ហ៊ីនហ្សូ អាបេ ចាប់ផ្តើម​ជាមួយ​ភរិយា​របស់​លោក​ស្ហ៊ីនហ្សូ អាបេ គឺ​លោកស្រី អាគី អាបេ ដែល​បាន​ប្រគល់​ប្រអប់​ដាក់​ធាតុ​របស់​លោកអាបេ ទៅ​ឲ្យគេ​ដាក់​នៅក្រោម​រូបថត លោកអាបេ នៅលើ​វេទិកា​ដែល​តាំងលំអ​ដោយ​ផ្កាភ្ញីស្អេកស្កះ។ នៅពេល​ថ្នាក់ដឹកនាំ​ពិភពលោក ចូលរួម​គោរព ជាចុងក្រោយ វិញ្ញាណក្ខន្ធ​របស់​អតីតនាយករដ្ឋមន្រ្តី ជប៉ុន លោក​អាបេ នៅខាងក្រៅ កន្លែង​រៀបចំ​កម្មវិធីបុណ្យ​ឯណោះវិញ ប្រជាជន​ជប៉ុន​ជាច្រើនពាន់នាក់ បាន​តម្រង់ជួរ ទៅគោរព ដាក់ផ្កា នៅមុខ រូបថត​លោក​អាបេ។ ពិធីបុណ្យសព​ថ្នាក់ជាតិ​របស់​លោក​អាបេ ត្រូវ​បាន​រៀបចំឡើង ជាមួយ​ការរឹតបន្តឹង​សន្តិសុខខ្លាំងបំផុត នៅ​បន្ទាប់​ពី ប៉ូលិស​ជប៉ុន​ទទួលស្គាល់ថា លោក​ស្ហ៊ីនហ្សូ អាបេ​ត្រូវ​ខ្មាន់កាំភ្លើង បាញ់សម្លាប់ ដោយសារ​តែ​មាន​ការធ្វេសប្រហែស របស់​អាជ្ញាធរ ក្នុង​ការធានា​ការពារ សន្តិសុខ ឲ្យលោកអាបេ។ តាម​កាសែត​ក្នុងស្រុកជប៉ុន នៅថ្ងៃនេះ ប៉ូលិស​ ជាង ២ម៉ឺននាក់ បាន​ពង្រាយ នៅគ្របចក្​​ផ្លូវ​ជុំវិញ កន្លែងប្រារព្ធពិធីបុណ្យ។ ហេតុអ្វីបានជាមាន​បាតុកម្ម​ប្រឆាំង​នឹង​ពិធីបុណ្យសព​របស់​លោកអាបេ? ការរៀបចំ ពិធីបុណ្យសព​របស់​លោកអាបេ បានបង្កើត​ឲ្យមានភាពចម្រូងចម្រាស នៅក្នុង​សង្គម​ជប៉ុន។ ជាការពិត នៅពេល​ថ្នាក់ដឹកនាំ​បរទេស និង​ប្រជាជនជប៉ុន​ជាច្រើន​ពាន់នាក់​តម្រង់ជួរ ដាក់ផ្កា គោរព​លោក​ស្ហ៊ីនហ្សូ អាបេ ប្រជាជន​ជប៉ុន​មួយចំនួន​ផ្សេងទៀត បាន​ចេញមុខ​ធ្វើបាតុកម្ម​ប្រឆាំង​នឹង​ការរៀបចំ​ពិធីបុណ្យសព​ថ្នាក់ជាតិ​ឲ្យ​លោក​អាបេ។ តាំង​ពី​សប្តាហ៍មុន បាតុកម្ម​ទាមទារ​ឲ្យ​លុបចោល​ការរៀបចំ​ពិធីបុណ្យសព​ថ្នាក់ជាតិ​សម្រាប់​លោក​អាបេ បាន​ចាប់កើនសន្ទុះ ខ្លាំង នៅទូទាំងប្រទេស។ បុរសម្នាក់ ត្រូវ​បានបញ្ជូន​ទៅ​មន្ទីរពេទ្យសង្រ្គោះបន្ទាន់ បន្ទាប់ពី គាត់​ដុតខ្លួន នៅមុខ​ការិយាល័យ​នាយករដ្ឋមន្រ្តី ដើម្បី បរិហារ​ការរៀបចំ ពិធីបុណ្យសព​លោក​អាបេ។ ការស្ទង់មតិ​បាន​បង្ហាញ​ថា មាន​ប្រជាជន​ជប៉ុន ៦០% ប្រឆាំង​នឹង​ការរៀបចំពិធីបុណ្យសព​ថ្នាក់ជាតិ​ឲ្យ​លោក​ស្ហ៊ីនហ្សូអាបេ។ ដោយពិតទៅ មាន​ហេតុផល​សំខាន់ពីរ ដែល​ធ្វើ​ឲ្យមាន​ចលនា​ប្រឆាំង ការរៀបចំ​ពិធីបុណ្យសព​ថ្នាក់ជាតិ របស់​លោក​អតីតនាយករដ្ឋមន្រ្តី ស្ហ៊ីនហ្សូ។ ទី១ គឺរឿង​ចំណាយថវិកា។ សម្រាប់អ្នកប្រឆាំង រដ្ឋាភិបាល​មិនគួរ​ចាយខ្ជះខ្ជាយ​ថវិកា ប្រមាណ ១១​លាន​ដុល្លារ សម្រាប់​រៀបចំ ពិធីបុណ្យ​សព​ថ្នាក់ជាតិ​ឲ្យ​លោកអាបេ នៅក្នុង​ខណៈពេល​ដែល​ប្រទេស​ប្រជាជន​កំពុង​ជួបការលំបាក​សេដ្ឋកិច្ច​នោះទេ។ ម្យ៉ាង ជប៉ុន​កម្រ​នឹង​រៀបចំ​ពិធីបុណ្យសព​ថ្នាក់ជាតិ​សម្រាប់​ថ្នាក់ដឹកនាំ​រដ្ឋាភិបាលណាស់។ គិតចាប់តាំង​ពី​ក្រោយ​សង្រ្គាម​លោកលើកទី២ ជប៉ុន​បាន​រៀបចំ​បុណ្យសពថ្នាក់​ជាតិ ឲ្យ​នាយករដ្ឋមន្រ្តីតែ​១រូបប៉ុណ្ណោះ កាលពី​ឆ្នាំ ១៩៦៧។ នៅជប៉ុន ពិធីបុណ្យសព​ថ្នាក់ជាតិ ធ្វើឡើង​សម្រាប់​តែ ព្រះអធិរាជជប៉ុន​តែប៉ុណ្ណោះ។ សមាជិក​សភា មកពី​គណបក្ស​ប្រឆាំង វិញ ក៏​បាន​បដិសេធ​មិន​ចូលរួម​ក្នុង​ចូលរួម​ក្នុង​ពិធីបុណ្យសពថ្នាក់ជាតិថ្ងៃនេះដែរ។ គណបក្សប្រឆាំង​បាន​ចោទប្រកាន់​រដ្ឋាភិបាល​របស់​លោកនាយករដ្ឋមន្រ្តី គីស៊ីដា ថា មិន​បាន​សួរយោបល់​សភា  ដើម្បី​រៀបចំ ពិធីបុណ្យសព​ថ្នាក់ជាតិ ឲ្យ​លោក​អាបេ។ សម្រាប់​ក្រុមប្រឆាំង លោក​នាយករដ្ឋមន្រ្តី គីស៊ីដា​ដែលធ្លាប់​មនុស្សជំនិត​ស្ថិតក្រោម​ការណែនាំផ្លូវ​របស់​លោក​អាបេ បាន​សម្រេចចិត្ត​តែម្នាក់ឯង ដោយសារ​ហេតុផលបុគ្គល ប៉ុន្តែ គ្មានគិតដល់​យោបល់​របស់​ប្រជាជន​ជប៉ុន។ ហេតុផលទី២ដែលធ្វើ​ឲ្យ​មានបាតុកម្ម​ប្រឆាំង​នឹង​ការរៀបចំបុណ្យសព​ថ្នាក់​ជាតិ​ឲ្យ​លោក​ស្ហ៊ីនហ្សូ អាបេ គឺមកពី​ជំហរ នយោបាយ​ផ្ទាល់​របស់លោក​អាបេ។ ប្រជាជន​ជប៉ុន​មួយចំនួនមិនចូលចិត្ត​នយោបាយ​របស់​លោកអាបេ ជាពិសេស​រឿង​ដែល​លោកអាបេ បាន​បង្កើតច្បាប់ ដើម្បី​បកប្រែ រដ្ឋធម្មនុញ្ញសន្តិភាព។ សម្រាប់ អ្នកប្រឆាំង​នយោបាយយោធា​និយម លោក​អាបេបាន​សម្រេចដោយ​អត្តនោម័ត ដោយ​ចង់​នាំជប៉ុន​ត្រលប់​ទៅធ្វើ​សង្រ្គាមសាជាថ្មី។ តើ​លោក​អាបេ មានន័យ​យ៉ាងណា​ សម្រាប់​ជប៉ុន ? នៅ​ក្នុង​សារថ្លែង​នៅក្នុងពិធី​បុណ្យសព​ព្រឹកថ្ងៃអង្គារ លោក​នាយករដ្ឋមន្រ្តី គីស៊ីដា ដែល​ឧស្សាហ៍ងើយ​មើល​រូបថត​តាំង​ដ៏ធំ​របស់​លោកស៊្ហីនហ្សូ អាបេ បាន​និយាយ​ចាត់ទុក​លោក​អាបេ ជាមនុស្ស​ដ៏ក្លាហាន និង​ថា ការបាត់បង់​លោកអាបេ​បានធ្វើ​ឲ្យ​លោក ឈឺចាប់ខ្លោចផ្សារខ្លាំង។ ធ្លាប់​ធ្វើការ​ជា​រដ្ឋមន្រ្តីការបរទេស នៅក្នុងអាណត្តិ​ដឹកនាំ​របស់​លោកនាយករដ្ឋមន្រ្តី ស្ហ៊ីនហ្សូ អាបេ លោក​នាយករដ្ឋមន្រ្តី គីស៊ីដា​បានរៀបរាប់​សកម្មភាព នយោបាយ​ជាច្រើន​ដែលលោក​អាបេ ​សម្រេច​បាន​នៅក្នុងពេល​លោក​ដឹកនាំ​រដ្ឋាភិបាល​ជប៉ុន។ នៅក្នុង​រយៈពេល ៥៥ឆ្នាំ លោក​ស្ហ៊ីនហ្សូ អាបេ ជានាយករដ្ឋមន្រ្តី​ជប៉ុន​ទី​២​ដែល​គេ​បាន​ផ្តល់កិត្តិយស ​រៀបចំ​ពិធីបុណ្យសព​ថ្នាក់ជាតិ។ ទាំងនេះ គឺ​មកពី​បុគ្គលលក្ខណៈ​ពិសេស របស់​លោក​អាបេ ដែល​បាន​កាន់តំណែងយូរជាងគេ ជិត ១០ឆ្នាំ ក្នុងនាម ​ជានាយករដ្ឋមន្រ្តី ដែលនេះ មិនធ្លាប់​មានទេ ក្នុងប្រវត្តិជប៉ុន។ គេសោកស្តាយ និង​គោរព លោក​ស្ហ៊ីនហ្សូ អាបេ ដោយមក​ពី​កេរ្តិ៍ដំណែល ស្នាដៃ​ដែលោក​សម្រេចបាន នៅក្នុងពេល អាណត្តិដឹកនាំ​របស់លោក។ ទោះ​មានអ្នកប្រឆាំង​នយោបាយ​យោធា​របស់​លោកអាបេ ប៉ុន្តែ​ប្រជាជន​ជប៉ុន​ភាគច្រើន​មិនអាច​បដិសេធ​ពី​ការងារ​លេចធ្លោ​របស់​លោក​ស្ហ៊ីនហ្សូ អាបេ នោះ គឺ​ស្ថិរភាព និង​សន្តិសុខ នៅជប៉ុន។ លោក​អាបេ​បាន​ចូលដឹកនាំ​ប្រទេស នៅក្រោយ ពេល​ដែលប្រជាជន​ជប៉ុន​កំពុង​រងទុក្ខ​ដោយសារ​រលកយក្ស​ស៊ូណាមី។ នយោបាយ​សេដ្ឋកិច្ច ដែលមាន​ដាក់ឈ្មោះ​របស់លោក គឺអាបេអេកូណូមី រដ្ឋាភិបាល​លោកអាបេ តាមរយៈ​ការបញ្ចេញ​ថវិកា​ជាច្រើន​ពាន់​លាន​យេន បាន​ជួយជំរុញ សេដ្ឋកិច្ច​ជប៉ុន ឲ្យ​ល្អគ្រាន់បើមកវិញ។ មួយវិញទៀត លោកអាបេ ជាមេដឹកនាំជប៉ុន​ដ៏កម្រ ​ដែលមាន​ទស្សនវិស័យវែងឆ្ងាយ​សម្រាប់​នយោបាយ​ការបរទេស​ជប៉ុន។ ដោយបានឈ្វេងយល់ មើលឃើញច្បាស់​ពីការពង្រីកដែនឥទ្ធិពល​របស់​ចិន នៅក្នុង​តំបន់ និងនៅក្នុង​ពិភពលោក ​លោក​ជានាយករដ្ឋមន្រ្តីជប៉ុន​លើកដំបូង ដែល​បាន​ធ្វើ​ឲ្យ​ជប៉ុន​ត្រលប់​មកធ្វើ​ជាអ្នកដឹកនាំ​ក្នុង​ឆាក​នយោបាយ​អន្តរជាតិ។ គេ​នៅចាំបានថា នៅពេល​អាមេរិក​របស់លោកដូណាល់ ត្រាំ ដក​ខ្លួន​ចេញពីកិច្ច​ព្រមព្រៀង​ពាណិជ្ជកម្ម​សេរី​អន្តរ​ប៉ាស៊ីហ្វិក ​ហៅកាត់​ថា​TPP លោក​អាបេ នៅតែ​បន្ត ជំរុញរក្សា​សន្ធិសញ្ញាដោះដូរសេរី ជាមួយប្រទេស​អាស៊ីផ្សេងទៀត ដូចជា​ឥណ្ឌា និងអូស្ត្រាលី នៅក្រោមឈ្មោះថ្មីគឺ Comprehensive and Progressive Agreement for Trans-Pacific partnership CP។ ជាមួយ​អូស្ត្រាលី ឥណ្ឌា និងអាមេរិក លោកអាបេ​ជានាយករដ្ឋមន្រ្តីជប៉ុន ដែលបាន​ជំរុញ ឲ្យបង្កើត​ក្រុមបក្សសម្ព័ន្ធ​យោធា រវាងគ្នា ដើម្បី​ទប់ទល់​ចិន និង​ការគំរាមកំហែង​របស់​កូរ៉េខាងជើង។ សម្រាប់អ្នកគាំទ្រ លោកស្ហ៊ីនហ្សូ អាបេជា​នាយករដ្ឋមន្រ្តី ជប៉ុន ដែល​មាន​ស្នាដៃជួយ​ឲ្យជប៉ុន​លេចមុខ​មាត់​នៅឆាកអន្តរជាតិ។ លោកជា​មេដឹកនាំ​ដែលដើរ​តួ​សំខាន់​ទាំងនៅ​ក្នុងប្រទេស​ជប៉ុន និង​នៅក្នុង​ពិភពលោក។ ដូច្នេះ លោកស៊្ហីនហ្សូ អាបេ សក្តិសម​នឹង​ទទួលបាន​ការរៀបចំ ពិធីបុណ្យសព​ថ្នាក់ជាតិ៕
    9/27/2022
    9:35

Über ព្រឹត្តិការណ៍អន្តរជាតិប្រចាំថ្ងៃ

Sender-Website

Hören Sie ព្រឹត្តិការណ៍អន្តរជាតិប្រចាំថ្ងៃ, ភ្ញៀវប្រចាំថ្ងៃ und viele andere Radiosender aus aller Welt mit der radio.de-App

ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Jetzt kostenlos herunterladen und einfach Radio & Podcasts hören.

Google Play StoreApp Store

ព្រឹត្តិការណ៍អន្តរជាតិប្រចាំថ្ងៃ: Zugehörige Podcasts

ព្រឹត្តិការណ៍អន្តរជាតិប្រចាំថ្ងៃ: Zugehörige Sender